Sania Mirza te an chak lo

India hmeichhe zinga tennis player langsar ber Sania Mirza chuan a season hnuhnung ber a hmang ṭan a, tournament an khelh hmasak ber Adelaide International 2-a doubles huangah an chak lo nghal.

Sania leh a ṭanpui Anna Danilina te hian seeded pakhatna Barbora Krejcikova leh Storm Hunter te chu 6-3, 3-6, 6-10 in an hneh lo. Inkhel inhnehtawk takah, set hnuhnung bera hun pawimawh laia a chesual zawk an nih an tuar.

Kar hmasa khan Sania hian February thlaa khelh tur Dubai Open chu tennis tournament a khelh hnuhnung ber a nih tur thu a sawi lawk, season hmasa khan a tan hun hnuhnung a nih tur thu a lo sawi tawh bawk.

Kum 36 mi Sania chuan, "A nihna tak sawi chuan ka rilruin a phak hi taksa lamin a phak ve ta lo, ka suangtuah anga ka chet theih tak loh avangin engkim a harsa ve ta," tiin a hun hnuhnung a nih thu a sawi nawn.

Hmeichhe doubles huangah Sania hi a vanglai chuan world number 1 a ni thei. Doubles leh mixed huangah Grand Slam nomawi paruk a la a, Indian hmeichhe tennis player zingah a thleng sang ber.