Atletico ngamtu Barcelona-in hma an hruai

Real Madrid chak loh laiin Barcelona erawhin hnehna an chang a, khualmualah an hmelma Atletico Madrid chu 1-0 in an hneh - Ousmane Dembele chuan inkhela goal awmchhun hi a khung.

Barca-in La Liga-ah hma an hruai chhunzawm zel a, hnehna an chan avangin an elpui Real Madrid chu match 16 ve ve khelh tawhah point thumin an tlansan ta bawk.

Atletico Madrid erawh an tlawm avangin top four pawn lamah an awm a, palina Real Betis chu point khatin an phak lo mek - champion aiin Champions League khelh phak chu an tum tur a ni ang.

Metropolitano Stadium-a inkhelah Atletico Madrid defender Stefan Savic leh Barcelona forward Ferran Torres ten 'wrestling ring' an hai a, an inkhuainuai avangin red card pek ve ve an ni.

Goal 'cial
Inrinni zan khan Real Madrid-in Villarreal an ngam lo a, an elpui chak loh thu hre sain Barca an inlan a, an phur - mahse, an lenchilh team hi La Liga mai ni lo, European football-a defensive game thiam ber pawl an ni a, Barca tan hmabak a hautak.

Mahse, minute 22-na lekah Xavi enkawl Barcelona thiam bikna hmuh turin a awm nghal. Team movement mawi tak hnuah Gavi siamsak chu Dembele chuan harsatna nei loin goal-ah a chantir a, beisei aia hmain goal kan hmu.

Barcelona hian an goal hnihna khung theihna remchang nei zui mah se Atletico si ban inkarah Jan Oblak a din ve miau avangin a awlsam bik lo a, Pedri chance neih chu a dansak.

Atletico pawhin chance an nei ve tho. Mahse, Jose Gimenez chuan goal hrulah tak a tauh out a, Antoine Griezmann chance neih pawh Barca keeper Marc-Andre Ter Stegen chuan ṭha zetin a dang.

A hmuhnawm
Second half-ah goal dang luh belh lo mah se inkhel hmuhnawmna a bo phah lo a, Spanish football-a club inhal pahnih inkhel an nih bawk avangin a hmuhnawm takzet.

Manchester City forward hlui Ferran Torres chuan goal a khung belhah inngai mah se offside vangin pawmsak a ni lo a, Griezmann-a'n a khung tawh ngei tura ngaih chu Ronald Araujo chuan line aṭangin a lo dang hman bawk.

Hun pek belhah Savic leh Torres te ball an inchuhna lamah an inbuan zui a, football danah inbuan a tel chiah loh avangin an pahnih hian hnawhchhuah zui an ni - hun tawp thlengin goal dang a lut lo a, 1-0 in Barcelona an chak.

Diego Simeone-a'n Atletico hi La Liga-ah match 418 zet a kaihruai ta a, Spanish top flight league-a club pakhat a zawna heti zat match kaihruai hmasa ber a ni - mahse, mellung pawimawh a phun zanah an chak zo lo.