Medvedev a inringtawk

Australian Open 2023 khel turin Daniil Medvedev chuan a inringtawk tih a sawi a, player ṭha dangte el phak turin tun hnaiah a khel ṭha ve leh tawk tawh nia a hriat thu a sawi tel bawk.

Adelaide International khelh zawh takah khan, semifinal-ah Medvedev hian Novak Djokovic a hneh lo - Serbian star Novak hi a champion zui a, Grand Slam atan pawh rinkai a ni chhunzawm dawn.

Russian tlangval Medvedev chuan, "Novak hi chu Grand Slam nomawi ringawt pawh 21 neih tawh a ni a, a nihna tak sawi chuan keini nen chuan huang khata dah chi kan ni lo.

"Eng inelna pawh ni se, Rafael Nadal leh Novak Djokovic ka hmachhawn dawn hi chuan a ṭha thei ang bera ka khelh a ngai, tihsual ka neih a thiang lo, tiin keimah leh keimah ka inhrilh mawlh mawlh zel.

"Player ṭha an nih avangin hmachhawn an châkawm lo. Amaherawhchu, anni hi pumpelh ngawt theih an ni lo a, a hneh dan kawng kan ngaihtuah a ngai, chumi tur pawh chuan ka inringtawk a ni," tiin a sawi.

Medvedev hian US Open 2021 khan Djokovic hnehin nomawi a lo chawi tawh, hard court hi a inkhelh thiamna hmun a ni a, hei vang hian kumina Grand Slam hmasa ber tur Australian Open atana a inringtawk hi a mak hran lo.