ISL-ah Mumbai City-in ro an rel zel

Lallianzuala Chhangte leh Lalengmawia Ralte khelhna Mumbai City chuan Indian Super League-ah ro an rel chhunzawm zel a, Pathianni zan khan Kerala Blasters chu 4-0 ngawtin an sawp.

Season bul ṭan fuh lo Blasters hi a hnuah insiamṭhain, match riat chhung chu a zawnin an tlawm tawh lo a, mahse, Mumbai club an tawn meuh chuan dawl zawrin an zawr a ni ber a, an che hleithei lo.

Mumbai Football Arena-a inkhelah hian mualneitu club hian minute 22 chhungin goal li an khung hman a, hei hi chak nan an hmang zui - Jorge Diaz chuan goal hnih khungin, Greg Stewart leh Bipin Singh ten goal khat ve ve an khung bawk a, Blasters lamin a chhanletna tur an nei lo.

Mumbai hian ISL match riat chhung chu a zawnin hnehna an chang ta a, Indian Super League-a match riat a zawna chak thei hmasa ber record an siam - table chung ber an luah zui a, match 13 khelh tawhah point hnihin Hyderabad FC an tlansan ve leh ta.

Tun season ISL-a goal sarih khung tawh Lianzuala'n goal khung lo mah se Greg Stewart goal khung tur a siamsak a, an match hnuhnung zawka kerek hliam vanga inlan thei lo Apuia pawhin inkhel bul a ṭan ve leh ta bawk.

ISL match a awm zui rih dawn lo a, Ningani zanah inkhel a awm leh chauh ang.