Milan leh Roma an inhnehtawk

Pathianni zan Serie A inkhelah AC Milan leh AS Roma te 2-2 in an inhnehtawk a, champion lai Milan an chak zawh loh lai hian hmahruai mektu Napoli erawhin Sampdoria chu si hnih faiin an luhchhuah thung.

Milan an chak zawh loh avang hian pakhatna Napoli nen an inkarah point sarih a awm ta, tun hnaia che ṭha tak Juventus nen an point a inzat a, goal difference nei ṭha zawk Old Lady chuan pahnihna dinhmun an luah.

San Siro-ah chhum a zing nasa a, khelmual a huhin a nal bawk. Player ten inkhelh harsa an ti tih a lang, mualneitu Milan chuan Pierre Kalulu leh Tommaso Pobega te hmanga goal khungin an dinhmun a ṭha hman hle.

Mahse, Jose Mourinho naute an beidawng ve ngai lo. Hun tawp hma minute thum chauh awm tawhah Roger Ibanez chuan a sut ṭhen a, hun pek belh minute thumnaah Tammy Abraham chuan a sut zo, khualmualah point khat hlu tak an hlawh chhuak.

Milan manager Stefano Pioli chuan, "Khatiang khawpa kan khel ṭha chungin point thum kan hmu lo a, hun tawp dawna goal hnih ngawt kan chhuah kha a makin hriatthiam a harsa ka ti hle," tiin a sawi.

Inkhel dangah Napoli an la che fuh zel. Inkhel tir lamah Matteo Politano chuan penalty hlah mah se, a hnuah Victor Osimhen chuan khungin Elif Elmas-a'n hun tawp dawnah penalty a khung belh bawk.

Napoli manager Luciano Spalletti chuan, "Ka naute khan kan chesual a nih chuan kan hmahruaina a nghet lo thei tih an hria, chutiang inkhel harsa leh pawimawh takah chuan player puitling an nihzia an lantir.

"Kan elpuite hi team ṭha tak tak an ni hlawm. A bik takin Juventus, Inter leh Milan te hi kan hmachhawn hmabak an la ni a, a harsa dawn hle," tiin nomawi inchuh boruak a awlsam loh tur thu a sawi chhuak.

Napoli hian an match lehpekah chuan Juventus an hmachhawn dawn. Turin club hi tun hnai Serie A match riat chhung chak zawn tawh an ni a, hmahruaitu Naples club tan hna a hautak dawn tih chu a chiang.