Sancho-a'n 2022 thleng contract a nei - Zorc

Manchester United-in season thar atan Jadon Sancho lak ngei an tum a, lakluh theih an beisei avangin Jack Grealish lak an tum tawh lo tiha sawi a awm bawk. Transfer hun a inṭan tawh avangin khawtlang media ten thutak leh rinthu an chawhpawlh chho a, player-in club thar jersey a pholan hma chu rin ngam a har ṭhin.

Jadon Sancho hian Ningani khan twitter-ah Marcus Rashford nen an lan dunna a pholang a, Nike fakna atana tih ni bawk mah se Manchester United ṭantute a ti phur hle. Sancho chuan, "Team khata kan awm vek chuan kan tlawm ngai lo ang," tih a ziak a, English winger-in sawi a tum tak erawh chi leh chi inthliarna lam a ni thung.

Khawthlang media ṭhenkhatin United leh Sancho an inhnaih sawt thu an ziak a, Dortmund-in United dawrna pound maktaduai 60 an pawm thu ziak telin English winger man hi pound maktaduai 100-a pung chho turin an tarlang.

Manchester United-in out and out winger ṭha an nei lo a, season tawp lamah Marcus Rashford leh Mason Greenwood te hman ni mah se mual sira khel atan chuan Sancho an tluk lo ve ve. Ole Gunnar Solskjaer-a'n nipui transfer-a lakluh atana duh ber chu Sancho nia hriat a nih avangin thuthang hi United ṭantute tan thu lawmawm a tling.

Solskjaer-a hote hi Premier League khelh zawh takah pathumna an ni a, season tharah Champions League an khelh dawn bawk avangin Sancho tan pawh Old Trafford lama kal a châkawm sawt. Amaherawhchu March thla khan Dortmund chief executive Hans-Joachim Watzke chuan a man phu tawk aia hniama hralh an tum loh thu an sawi a, English winger man atan hian pound maktaduai 100 vel an phut a, Covid-19 vangin tih hniam an tum lo.

July thla laihawlah pawh Dortmund hi an ṭanna ngaiah an la ding a, hetia thuthang an rik hluaiah pawh hian thil awm dan a la danglam lo. Manchester United-in Sancho an la duh reng a, BVB pawh hi an player mana an phut zatah an chiang bawk.

Ningani khan Dortmund director of football Michael Zorc chuan, "Jadon hi player chungchuang bik a ni a, a kum angah phei chuan hetiang reng hi ka la hmu lo. Football khawvelah chuan a kum ngaihtuah tel chungin player hraw ber a ni hial ang," tiin United en thlak Sancho a dah san thu a sawi.

Sancho hmalam hun chung sawi zuiin Zorc chuan, "Kan duhthusamah chuan kan bulah cham se kan duh. Tun ang boruakah chuan thu chiang awm chu Sancho hian kan bulah kum 2022 thleng contract a nei," tiin a sawi a, Manchester United nen inremna a neih loh thu a sawi.