McLaren-ah Daniel Ricciardo a lut

Formual 1 team ṭha McLaren chuan Daniel Ricciardo an lalut a, 2021 season aṭangin an car a khalh ṭan ang. Inremna an neih thu hi team chuan nimin khan an puang.

Australian tlangval hian Lando Norris nen McLaren car an khalh dawn, McLaren lamin driver an kawl sa Carlos Sainz chuan Ferrari a pan tura ngaih a ni thung - Ferrari-ah hian Sebastian Vettel-a hmun luah ṭhin chu a ruak dawn a ni.

McLaren Racing chief executive officer Zak Brown chuan, "Tun hun chauh ni loin nakin hun kan ngaihtuah tel a, chutiang atan chuan Daniel hi kan mi duh a ni a, kan hnenah nuamti taka hlawhtlinna a chan chhoh ngei kan beisei," tiin a sawi.

Ricciardo hi tunah chuan Renault car khalhtu a ni, tun hma lamin Red Bull car a lo khalh tawh bawk - 2014 aṭanga 2018 chhung khan car intlansiakna sang berah hian vawi sarih hnehna a lo chang tawh, driver tawnhriat nei ṭha a tling.

Ricciardo chuan, "Renault team mi ka la ni reng a, season kan hman tur hi a ṭha thei anga bera tlan ka tum dawn. Ka hmabak hmasa chu Renault nena hlawhtlinna chan tum a ni, chumi hnu lamah chuan chona thar ka hmachhawn tawh ang," tiin a sawi.

Formula 1 season hi March thla khan ṭan tur ni mah se coronavirus vangin an la tlan ṭan lo. July thla hian kumina a hmasa ber atan Austrian Grand Prix chu a hmuna entu awm loin tlan an tum, hei pawh hi beiseina a la ni rih.