Wales player ropui ber Bale a chawl

Wales captain Gareth Bale chuan kum 33 mi niin football khelh a chawlhsan thu Thawhṭanni zan khan a puang. Real Madrid forward hlui Bale hian an ram hi FIFA World Cup leh Euro C'ship a khelhpui a, Champions League-ah vawi nga a champion a, Wales footballer zinga ropui ber ang hiala chhal theih a ni.

Bale chuan, "Uluk taka ka inngaihtuah hnuah club leh ram tana inkhelh chawlhsan turin thutlukna ka siam. Ka infiamna ngaih em em football khel theia hun ka hmang hi vannei ka inti hle," tiin a chawlh thu a puang.

Player ropui ber?
Wales hian player ṭha chungchuang Ian Rush, Mark Hughes leh Ryan Giggs te an nei tawh a, amaherawhchu Bale anga ram tana sulhnu hnutchhiah ṭha an awm lo.

Kum 1958 khan Wales hian FIFA World Cup an khel tawh a, quarterfinal an thleng. Mahse, hemi hnu hian Rush, Hughes leh Giggs te hian an ram hi World Cup an thlenpui thei lo.

Bale erawhin Wales hi World Cup khel turin a tlinpui a, Qatar an zin theihna kawngah player pawimawh bik a ni. Hei chauh hi a ni lo, an la khelh ngai loh Euro C'ship-ah inelna zawnin a tlinpui a, semifinal leh last 16 a thlenpui bawk.

Kum 33 mi Bale hian ram tan match 111 khelin goal 41 a khung a, Wales tana match khel tam ber leh goal khung tam ber a ni a; Welsh Footballer of the Year-ah ṭum ruk thlan niin hei pawh hi record a ni.

Bale-a zinkawng
Bale hi July 16, 1988 khan Cardiff-ah a piang a, Southampton academy aṭanga bul ṭanin left back-ah a khel ṭhin. Saints tan hian match 45 khelin goal nga a khung. Kum 2007 khan pound maktaduai 10-in Tottenham a zawm.

Welsh wing back hi a tlan chak avang leh goal hmaa a hlauhawm avangin a khelhna position pawh sawn hma hret a ni a; October 20, 2010 khan Champions League-ah Inter Milan hmachhawnin hei hi a dinhmun thlak danglamtu a ni.

Spurs keeper Heurelho Gomes chu minute riatna lekah hnawhchhuah a ni a, player 10-a khel English club hi 4-3 in chak lo mah se European champion lai lakah hian Bale-a'n hattrick a siam.

Bale hian season ruk chhungin Tottenham tan match 203 khelin goal 55 a khung a, kum 2013 khan a hun laia player man to ber ni turin Real Madrid a zawm.

British media te tarlan danin Bale-a man hi pound maktaudai 85.3 a ni a, Cristiano Ronaldo record a khum. Bale hian Los Blancos tan season riat a khel a; Champions League (5), FIFA Club World Cup (3), UEFA Super Cup (3), La Liga (3), Copa del Rey (1) leh Supercopa de España (1) ah te a champion pui vek.

A hun tawp chu MLS Club Los Angeles-ah a hmang a, MLS Cup leh Supporters' Shield a lakpui.

Lionel Messi leh Ronaldo te nen vanglai hun an hman rual avangin Bale hi a ropui angin a lang ropui tawk lo a, amaherawhchu Wales leh football khawvel tana a hnathawh erawh hriat reng a ni ang.