MFA-in ‘Inkhelh Pui’ buatsaih dawn

Mizorama football thuneitu sang ber Mizoram Football Association chuan kumin hian an Golden Jubilee pualin 'Inkhelh Pui' buatsaih an tum a, an buatsaih dan tur chiah erawh tihchian a la ni lo.

Kum 2023 atana MFA Executive committee hmasa ber hi January 9, Thawhlehni khan MFA Office-ah neih a ni.

MFA Golden Jubilee
MFA hi kum 1973-ah din niin kum 2023 hi a kum 50-na a ni a, MFA chuan Golden Jubilee hi ropui taka läwm a rel. He mi puala 'Inkhelh Pui' buatsaih te, Mizoram aiawha khel tawh player-te koh khawm a rel bakah a lawmna hunpui hman dan tur ngaihtuahtu MFA Golden Jubilee Celebration Committee a din bawk.

MFA Women's League
MFA Women's League chu April, 2023 hian Aizawlah buatsaih a ni dâwn a, he inelna hi AIFF duan angin kalpui tur a ni. Player-te chu AIFF Centralised Registration System hnuaia ziah luh vek tur an ni dâwn a, hmeichhe football chawi kanna tura hlawhtling taka buatsaih a nih theihna turin MFA Women's League Board din nghal a ni. Team tel duh tur chuan MFA Women's Committee secretary R. Lalramzauva (9436156858) zawh chian theih a ni ang.

Referee Development Programme
MFA chuan Mizoramah football referee ṭha zawk an lo chhuah zel theihna turin Mizoram chhunga hman tur referee tam zawk chher dan a ruahman dâwn a, District FA-te nen ṭangkawpin hmun hrang hrangah referee inzirna hun a buatsaih dâwn a ni.

Hetihlai hian AIFF-in referee kalphung a thlak danglam dâwn a, AIFF nen ṭangkawpin Referee Development Program kalpui dan ngaihtuah a ni bawk ang.

Inter District Junior Football Boys Championship
MFA Inter District Junior Boys Football Championship chu March 28 aṭangin Kolasib District Football Association-in an thleng ang. He inelnaah hian January 1, 2007 leh December 31, 2009 inkara piangte an tel thei ang.

MFA Cup
MFA Cup chu April 18, 2023 hian Khawzawl District Football Association-in an thleng dâwn a, he inelnaah hian DFA tin aiawh football club-te an tel ang.

Under 17 & Under 13 League
Mizoram Premier League Under 17 chu duan lawk tawh angin February-ah khelh tur a ni dâwn a, MPL Club pariatte an inel ang. Hei bakah hian MFA Under 13 League buatsaih tum a ni bawk a, hei hi chu Naupang League khel mêkten an khel thung ang.

AIFF Beach Soccer & Futsal C'ship
AIFF chuan a vawi khatna atan National Beach Soccer Championship chu January 26-31, 2023 chhung hian Surat, Gujarat-ah a buatsaih dâwn a, hetah hian MFA chuan team a tir dâwn a, a enkawltu tur ruat fel nghal a ni. FIFA-in a beisei angin AIFF hian Beach Soccer inelna hi kum tin a kalpui ṭhin tawh dâwn a ni.

AIFF Futsal Club Championship chu February 5, 2023 atangin New Delhi-ah khelh a ni dawn a, hetah hian MFA Futsal League champion lai Electric Veng Futsal Club an kal ang.