Lloris-a'n ram tana inkhelh a chawlhsan

France tana goalkeeper rintlak leh captain ni bawk Hugo Lloris chuan ram tana inkhelh a chawlhsan thu a puang a, World Cup nomawi ber a chawi tawh avangin ram tan thlakhlelh dang a ngah tawk tawh lo niin a lang.

Kum 36 mi Lloris chuan, "Ka theihna zawng zawng ram tan ka hlan ṭhin, tih inhre chungin international football hi ka chawlhsan dawn a ni," a ti a, Les Bleus jersey hak leh a tum tawh lo.

Tottenham Hotspur keeper chuan, "Euro qualifying khelh nan thla hnih leh a chanve chauh a awm leh tawh a, hei vang hian tun huna ka hun hman dan tur puan lawk hi a finthlak a ni," a ti.

Lloris hian November, 2008 khan kum 21 mi lek niin, ram tana a match hmasa ber a khel a, international friendly match-ah Uruguay an hmachhawn.

Mahse, ram tana inkhelh a chawlhsan meuh chuan Tottenham Hotspur keeper hian ram tan match 145 khelin, heng zinga 121-ah hian captain a ni a, Les Bleus tan ani aia inlan hnem an awm lo - France tana captain armband hreng ngun ber a ni bawk.

World Cup final vawi hnih khel a, kum 2018-a champion nomawi chawipuitu Lloris chuan, "Midang tana kawng kan ken hun hi a lo thleng ve leh mai ṭhin. French national team hi mi pakhat ta bik a nih lohzia ka lo sawi fo tawh ṭhin a ni," a ti.

Tottenham Hotspur keeper chuan sawi zawmin, "Ka hmun ruak luah tur hian inpeihsa at reng pakhat a awm a, chu chu AC Milan keeper Mike Maignan a ni.

"Hetihlai hian kei chuan ka chhungkua leh ka fate tan hun ka mamawh a ni," a ti a, chawlh hahdam phu ve tawha a inhriat thu a sawi.

Lloris hian football hrim hrim erawh chawlhsan a la tum lo. French keeper chuan, "France tana season 14 leh a chanve ngawt khelh theih hi thil ropui a ni.

"Chutihrual chuan rilru ngaihtuahna a tibuai em em ṭhin a, hetiang tala hahchawlhna hun ṭha ka insiam hian, rei zawk top flight league-a khel turin min puih theih ka ring a ni," a ti.

France tana World Cup nomawi chawitu Lloris-a'n France jersey hain khelmual a lut leh dawn tawh lo.