Man City hmaa ding tur Saints

Caraboa Cup quarterfinal chu zaninah khelh chhunzawm a ni dawn. Nottingham Forest-in zanin dar 1:14-ah Wolverhampton Wanderers an mikhual ang a, record nei ṭha Manchester City-in zanin dar 1:30-ah Southampton hmachhawn turin St. Mary's Stadium an tlawh bawk ang.

Manchester City-in Arab sum mawm an chawm an hnua an nomawi chawi hmasa ber chu Premier League a ni a, kum 2012 khan Roberto Mancini hoin an champion. Premier League ang bawka City-in tun hnaia nomawi an chawi tam chu League Cup hi a ni a, league nomawi nen vawi ruk ve ve an chawi.

Kum 2014 khan Man City-in Manuel Pellegrini hoin league nomawi leh League Cup hi an chawi kawp a, season khatah nomawi pahnih an chawi. Pep Guardiola awm hnuah phei chuan season tinin nomawi pakhat tal chawi tura ngaih an ni tawh a, tun hmaa club lian zawkin an lak thutak ngai loh League Cup pawh an la thutak hle.

Quarterfinal kalkawng
League Cup-ah hian Europe-a inlan chin team chu third round aṭang chauhin an khel ṭan. Manchester City hian quarterfinal thleng turin Chelsea (2-0) leh Liverpool (3-2) te an hneh a, anni aia kalkawng hautak a awm lo ang.

Southampton erawh match khatin khel tam mah se quarterfinal thleng tura an khingpui an nem zawk. Saints hian League Two club Cambridge United chu 3-0 in second round-ah an hneh a, third round-ah League One club Sheffield Wednesday chu penalty shootout hmangin an hneh hram.

Fourth round-ah Southampton-in Lincoln City 2-1 in an hneh a, Nathan Jones-a hote hian quarterfinal thleng turin Premeir League club chu sawi loh Championship club pawh an hmachhawn lo. Amaherawhchu Saints hian City an hmachhawn dawn avangin semifinal thlen erawh a harsa ang.

City an ṭha
Man City hi eng inelnaah pawh champion rinkai an ni pha vek a, an squad a chhah avangin inela pali champion vek tur pawhin theihna an nei. Chutihrualin tun season-ah squad an siksawi nual avangin kum dang angin team angin an la khel tawk lo a, an khelh dan pawh a la ngelnghet tawk lo.

Pep Guardiola hote hi nikum kumtawp khan Everton nen Premier League-ah 1-1 in an inhnehtawk a, kumin kumtirah Chelsea 1-0 in an hneh hram bawk. Mahse, an match hnuhnung berah Chelsea 4-0 in an sawp a, FA Cup fourth round an lut.

FA Cup-ah hian City squad ṭhatzia a lang a, Blues an hmachhawn chungin player langsar an awltir nual. Pep-a'n match hnuhnung berah player ṭha awltir tawh mah se kartawpah Old Trafford an tlawh dawn avangin Saints lakah hian sa huai an ser erawh a rinawm chuang lo.

Southampton hi October thla tawpa Arsenal chelhtute kha an ni a, amaherawhchu Saints hian Gunners an hmachhawn hnuah Premier League match rukah a zawnin an chak lo. Nathan Jones-a hote tana chanchin lawmawm erawh knockout inelnaah an la dam ve ve a, kartawp khan FA Cup-ah Crystal Palace chu 2-1 in an hneh a ni.