Portugal coach thar Roberto Martinez

Roberto Martinez chu Portugal coach atan lakluh a ni a, coach thar a nih hnuah zawhna chhangin captain Cristiano Ronaldo chu ram tana a hma lam hun a sawipui tur thu a sawi chhuak.

Kum 49 mi Martinez hian Fernando Santos hmun ruak a luah. Qatar World Cup quarterfinal-ah Portugal hian Morocco an hneh lo, a hnuah an coach Santos chuan a hna a kalsan zui nghal, tunah amah thlaktu an hmu.

Spanish manager pawh hi Belgium coach ni ṭhin a ni a, nikum kum tawpa khelh World Cup thleng khan Red Devils hi a enkawl, kum ruk chhung a enkawl tawh ram hi group stage paltlangpui zo loin an tla a, a hna a kalsan zui bawk.

Martinez chuan, "Player ṭha leh theihna nei sang tak tak awmna ram ka enkawl thei tur hi ka lawm. Portugal FA President nen kan inbiak ni hmasa ber aṭangin engkim a kaltluang nghal duak tiin a sawih theih.

"Hmathlir thui leh ṭha tak an nei a, beiseina an nei sang bawk," tiin Portugal team a enkawl tur chu a phur hle tih a sawi. Portugal football president Fernando Gomes pawhin an ram team tan hun pawimawh a ni tih a sawi ve bawk.

Martinez hian tun hmain Wigan a lo enkawl tawh a, kum 2013 khan FA Cup a champion pui. Chumi hnuah Everton enkawlin Premier League-ah vawi khat chu pangana a nihpui a, a hnuah ṭum hnih dang chu 11-na dinhmun an luah.

Club football kalsanin 2016 aṭang khan Belgium ram a enkawl ṭan. European ram hi kum hnih chhungin FIFA world ranking-ah pakhatna dinhmunah a hlangkai a, an thlen san ber erawh Russia World Cup-a pathumna an nih kha a ni thung.

Belgium player ṭha rual a champion pui loh avangin sawiselna pawh a tawk nasa, tunah player ṭha rual awmna Portugal a enkawl leh dawn, mawhphurhna a sang dawn tih chu sawi lawk ngam a ni.

Portugal hian Santos-a kaihhruaina hnuaiah khan 2016 European Championship leh 2018-19 Nations League nomawi an chawi, an duh leh beisei ber erawh FIFA World Cup a ni thung.

Qatar World Cup-ah beisei an phak lo a, an captain Ronaldo chu inkhel pawimawha thlan zingah a tel lo bawk. Martinez chuan, "Ram tana khel thei player 26 biak ka duh, chung zingah chuan Cristiano Ronaldo pawh a tel," tiin a sawi.