Kar hnih chawl tur Durant

Brooklyn Nets thiampuipa Kevin Durant chu a khup ding lam hliam vangin a rei lo berah kar hnih chhung tal a chawlh a ngai dawn. Nets tan chuan an forward inhliam hi chânna lian tak a ni thei ang.

Thawhṭanni NBA regular season inkhelah Nets hian Miami Heat chu 102-101 in an hneh. He inkhelah hian Heat guard Jimmy Butler-a'n basket neih tuma a lay-up chu Ben Simmons-a'n a lo 'block' sak a, Butler hi lei lamah tla zuiin a sira ding Durant-a khup hi a zuk delh hliam.

Season hmasa, nikum January 15 khan Durant hi New Orleans Pelicans an hmachhawn ṭumin a khup a lo hliam tawh a, hei vang hian thla khat chhung a chawlh a lo ngai tawh bawk, a hmun ruak a zau thei hle.

Durant awmna Nets hian tun season an hmang ṭha, tun hnaiah bik phei chuan match an khelh hnuhnung 20 zinga 18 zetah an chak thei. Season pumpuiah vawi 27 an chak thei a, anni aia chak hnem chu vawi 27 chak tawh Boston Celtics chauh an ni.