Zidane sawiseltu French FA President-in ngaihdam dil

French football-a thuneitu sang ber French football federation president Noel le Graet chuan tun hnaia Zinedine Zidane chungchang a sawi dan avangin ngaihdam a dil a, fan-te huat rawn erawh a hlawh hman viau.

Real Madrid boss hlui Zidane hi tun hnaiah France nen sawizawm an ni nasa a, mahse, tun hnaiah coach ni lai Didier Deschamps chuan kum 2026 thleng cham chhunzawm turin contract thar a ziak.

Hemi chungchangah hian French radio station RMC chuan Noel le Graet hi an kawm a, he an inkawmnaah hian Zidane an dawr lohzia sawifiah nan call pawh ni se, Zidane-a call chu a lak loh tur thu a sawi!

Noel le Graet chuan, "Min rawn phone ta pawh ni se a phone ka la kher lo ang. Eng atan nge ani chu ka biak ang? "Ka pu, pawi tisuh, club dang lo zawng mai rawh - Didier contract thar kan ziahpui e, ti turin maw?

"A duh duh tirawh se. Ka lo buaina tur a ni lo. Zidane hi a mimalin kan la inhmu lo a, Didier nena inṭhen kan ngaihtuah ngai lo bawk," a ti.

Paris St-Germain forward Kylian Mbappe chuan Zidane lo chhan vatin, "Zidane tawp hi France a ni a, hetiang hian kan legend te kan ti ngai lo," a ti a, Noel le Graet tan zahna tham a ni.

France sports minister Amelie Oudea-Castera pawhin Le Graet-a ṭawngkam chu zahpuiawm a tih thu a sawi a, ngaihdamna thu sawi vat turin a phut bawk.

Le Graet chuan, "Ka thusawi avangin ngaihdam ka dil a, player leh coach ropui tak a nihna hi ka pawm em em reng a ni," a ti a, RMC bulah chuan interview nei miah lo tur an nih thu a sawi bawk a ni.

Zidane hian player a nih laiin World Cup 1998-ah khan France hi champion nomawi a chawipui a, coach a nih hnuah Real Madrid chu Champions League-ah a zawnin vawi thum a champion pui a, La Liga nomawi vawi hnih a chawipui hman bawk.

France enkawl chhunzawm tur Deschamps hian World Cup 2018-ah khan France hi a champion pui a, 2022-ah final lutin, Euro nomawi a la chawi lo thung.