Arsenal tan buaina tur awm lo

Mikel Arteta enkawl Arsenal chuan FA Cup bul an ṭan fuh, an striker rinrawl Gabriel Jesus awm lo mah se Eddie Nketiah an nei miau a, goal khung kawngah harsatna an tawk lo - an mikhualna ramah Oxford United chu 3-0 in an luhchhuah.

Thawhṭanni zan inkhelah Mohamed Elneny chuan goal hmahruai a tauh lut a, striker Nketiah chuan 'striker goal' hnih khungin, mualneitu League One club lamin a chhanletna tur an nei ve lo.

FA Cup champion hnem ber Arsenal hian fourth round-ah chuan Manchester City an hmachhawn dawn. Chumi hmain Premier League lamah Tottenham Hotspur leh Manchester United an tum dawn, an hmabak a hautak chho dawn hle.

Kassam Stadium-a inkhelah Arteta-a'n chetsual palh a hlau, tlarhma lamah Nketiah, Gabriel Martinelli leh Bukyo Saka te inkhel bul a ṭantir vek a, goal khung ngei an tum a, replay khelh hah ngai loa tlang an tum tih a chiang bawk.

A tir lamah goal khung harsat mah se, second half-ah erawh Arsenal an chungnung hle. Fabio Vieira-a freekick chu Elneny chuan tauh lutin, Portuguese midfielder Vieira hian Nketiah tan ball fing a pe chhuak bawk.

Nketiah a tlan chak a, defender a tlan hel hman bakah keeper Edward McGinty thlen hmaa ball la hmanin a pet goal daih, a goal hnihna pawh Martinelli-a pek chu angle zim angreng takah 'cool' zetin a khung.

Gunners manager Arteta chuan, "Eddie Nketiah hi a thawkrim a, khelmual chhungah hian a ṭha tial tial. Striker pakhat chauh kan nei a, a chungah mawhphurhna pawh a sang hle, mahse ani hi kan mamawh ang taka khel thei a ni," tiin a sawi.

Nketiah hian tun hnai match hnuhung paruk aṭangin goal nga a khung, striker Jesus inhliam karah a hna a lo tlin rih viau. Shakthar Donetsk aṭanga Mykhailo Mudryk an la a nih pawhin an academy chhuak Nketiah hi awlsam taka nek chhuah theih mai a ni lo ang.

Hnehna an chan avangin Arsenal an lawm, an player ṭha ṭhenkhat khelhtir ngai lo chunga an chak thei kha an lawmna tizualtu a ni ang. Vieira ke aṭangin ball hlauhawm a chhuak thei tih a chiang a, bench lama ṭhu chung pawha phunnawi lo Elney an neih ṭangkaina an hmu bawk ang.

Keeper Aaron Ramsdale dah ṭha mah se goalkeeper Matthew Turner-a'n hnathawh tur a nei meuh lo. Hun rei tak hliam vanga chawl tawh Emile Smith Rowe a lo kir leh tawh bawk, season chawhnu lam match tam huna chhawr tur an neih belh.