Ka dam hman ka beisei - Raducanu

Emma Raducanu chuan Australian Open khel tura a dam hman a beisei a, chutihrualin tennis season khat chhunga Grand Slam hmasa ber hi a khel ngei ngei dawn tih erawh a la sawi chiang thei lo thung.

Kar hmasa khan ASB Classic, Auckland-ah Raducanu hi a inlan a, second round an khelh laiin hliam vangin a inkhel zui thei lo, loh theih lohna vangin a inhnuhdawh a ngai ta a ni.

Britain nula Raducanu chuan, "Tournament hi January 16-ah khelh ṭan a ni dawn, chumi hunah chuan ka dam hman chu kan beisei. Ni tin ka dinhmun endik ziah a ni a, beiseina nen hmalam kan thlir mek.

"Australian Open khelh dan tur erawh sawi lawk vak theih a ni lo thung a, ka taksa dinhmun a zirin ngaihtuah chawp tur a la ni ang," a ti. Inelna a hmachhawn a nih pawhin a ṭhat dan berin a khel thei rih dawn lo tih chu a sawi lawk ngam.

Kum 20 mi Raducanu hian 2021 khan US Open nomawi a chawi, qualifier paltlanga a champion avangin khawvel mak tih a hlawh. World ranking lamah pawh nikum July thla kha chuan a sang zual 10 zingah a tel phak hial.

Mahse, coach nghet a nei hleithei lo a, hliam a neih fo bakah tournament a khelh hoah a che fuh hleithei lo bawk. Tunah chuan world number 75 a ni daih a, major tournament khelh turah hian seeded a ni phak dawn lo.

Australian Open 2023-ah hian hliam vanga inlan thei lo tur an awm nual. Vawi hnih champion tawh Naomi Osaka a inhnukdawk tawh, wildcard an pek Venus Williams pawh a khel thei dawn lo - damdawi hman phal loh chungchanga buaina nei Simona Halep hmel kan hmu thei lo bawk ang.