Chelsea-in Potter an thlawp

Tun hnai an result avangin Chelsea chuan coach Graham Potter an ban mai rinna lian hman viau mah se, English coach chungah rinna nghah chhunzawm zel an thlang a, Potter ban mai an tum lo.

Brighton & Hove Albion boss hlui hian Blues a enkawl tirhah result nei ṭha mah se, tun hnaiah beisei ang result a neihpui thei lo a, inelna hrang hranga match an khelh hnuhnung pakuaah vawi ruk ngawt an tlawm.

Pathianni zan khan FA Cup-ah Manchester City chu 4-0 ngawtin an ngam lo bawk a, an tlawm mai ni loa an mualpho tel avangin Blues fans tam tak chuan Potter hi bang turin an duh.

City laka an tlawm ṭum hian fan-te chuan September-a ban tak Thomas Tuchel-a hming an lam ri a, London club siam liantu, mahse, UK sorkar nena harsatna avanga Chelsea hralh ta Roman Abramovich hming an lam ri bawk.

Mahse, heti chung hian Chelsea board chuan Potter-a chungah rinna nghah an thlang a, tun hnai an result chu Coach thiam loh bik ni loin, hliam ngah vang ni pakhatah an ngai.

Premier League club langsar ber pawl Blues hian hliam vangin Reece James, Ben Chilwell, Wesley Fofana, N'Golo Kante, Raheem Sterling leh Christian Pulisic te an chhawr thei lo mek a ni.

City laka an mualpho hnu lawk khan Potter hian, "Hmasawn kan mamawh a, football club kan nihna anga kan dinhmun hi a duhawm loh em avangin kan thawhho a ngai a ni," a ti a, club an talbuai thu a pha lo.

Chelsea hi FA Cup hma hian League Cup aṭangin an tla tawh bawk a, Premier League-ah 10-na ni mekin champion an beisei theihna chu Champions League chiah a ni tawh - hei pawh tuna an dinhmun en chuan, "Vana rah," tia sawi mai awlsam a ni.

London club hi Ningani zan dar 1:30-ah league match khel turin an inlan dawn a, Premier League table-a pasarihna ni mek Fulham an lenchilh dawn - fan-ten result ṭha zawk an beisei tawh ang.

May thla khan Chelsea hi chairman Todd Boehly leh Clearlake Capital te ṭangkawpin an lei a, neitu thar an neih hnuah player thar lei nan pound maktaduai 250 chuang daih seng mah se an beisei ang result erawh a keng tel lo.

Chelsea sporting director dinhmun chelh lailawktu Boehly hi sporting director a ni tawh dawn lo a, technical director thar Christopher Vivell leh director of global talent and transfers Paul Winstanley te chu transfer bazar-ah an duh ang lei turin zâlenna zau zawk a pe dawn.