Haller-a'n training pangngai a zawm

Borussia Dortmund forward Sebastien Haller chuan training a zawm pangngai ve leh ta a, a inkhelh theih hun tur tak tihchian la ni lo mah se khelmual chhungah a hmel kan hmu leh hnai tawh.

Haller hian nikum July thla khan Ajax aṭangin Dortmund hi a zawm. Bundesliga hi kum li chhung atan a zawm a, mahse a club thar a zawm aṭanga kar lina lekah a tilmu a cancer tih an hre chhuak.

A natna hi zai a ni a, enkawl chhunzawm niin tunah chuan a dam tawh. Haller chuan, "Ka nuna thla ruk chhung hrehawm leh rei ka tih ber a ni hial ang. Ka tan chuan ṭhiante bula training a nuam a, engkim mai hian beiseina min siam thar.

"Ka natna avang hian engkim mai hi tum chuan tih theih loh a awm lo tih ka hre chhuak, club hmunhma nuam leh ṭha tak taka training han neih leh chiah mai chuan min tiphur hle," tiin a sawi.

West Ham leh Eintracht Frankfurt tan pawha khel tawh Haller hian Ajax tan goal 34 a khungsak hman a, nipui bazar hmasa laia Erling Haaland a chhuah khan Dortmund hian an striker chhuak ta thlak nana an lak a ni.

Bundesliga table-ah Dortmund hi parukna an ni mek, league match 15 khelh tawh aṭangin point 25 an hmu - hmahruaitu Bayern Munich an phak lohna chu point kua lai a ni. Tun kartawpah Augsburg an lo mikhual ang.