Kan la beidawng lo - Atalanta coach

Atalanta coach Gian Piero Gasperini chuan amah leh a naute an la beidawng lo tih a sawi a, season bul ṭan fuh tawk lo mah se season thara Champions League khelh phak ngei tumin theihtawp an chhuah chhunzawm dawn tih a sawi.

Thawhṭanni zan Serie A inkhelah Atalanta hian Bologna 2-1 in an hneh. Mualneitu Bologna lamin minute rukna lekah Riccardo Orsolini hmangin hma an hruai a, chawlhlawk laiin si khat faiin hma an hruai.

Second half tirah midfielder Teun Koopmeiners chuan siphurh sutin, minute 58-naah Rasmus Hojlund chuan goalkeeper Lukasz Skorupski paltlangin an goal hnihna leh chakna goal ni nghal bawk a khung.

Atalanta hian khualmual bikah league match an khelh hnuhnung pangaah an chak lehna hmasa ber a ni a, season chawhma lama an sulhnu ṭha lo leh duhawm lo takte kha thaibo chhunzawm an tum dawn.

Coach Gian Piero Gasperini chuan, "Tunah chuan parukna kan ni ve leh ta, palina Inter Milan nen kan inkarah point thum chauh a awm, chuvangin match khat lekah thil hi nasa takin a la danglam thei tih a chiang hle.

"Season dangah pawh champion chiah lo mah ila team hlauhawm zingah kan tel ṭhin, kuminah pawh kan thil tum kha a la pangngai reng, a sang zual pali zinga tel tumin theihtawp kan chhuah chhunzawm tur a ni ang, beidawn a thiang lo," tiin a sawi.

Thawhṭanni zan Serie A inkhel dangah Verona chuan anmahni ang bawka talbuai Cremonese chu 2-0 in an hneh ve bawk.