West Bengal leh Maharashtra te an chak

Santosh Trophy vawi 76-na khelh mekah champion rinkai West Bengal chuan Thawhṭanni khan Dadra & Nagar Haveli and Daman & Diu chu 5-0 in an sawp a, chawhma dar 11:30-ah group IV inelna thlengtu Maharashtra-in Chhattisgarh 1-0 in an hneh ve bawk.

Tukin zing dar 8:00 hian West Bengal-in Madhya Pradesh an hmachhawn ang a, Maharashtra-in Dadra & Nagar Haveli and Daman & Diu an hmachhawn ve bawk ang.

Group IV hian January 15, Pathianni hian an khel zo ang a, group la khel lo awm chhun group VI erawhin January 22, Pathianni aṭangin an khel ṭan chauh dawn. Group VI-ah hian Punjab leh Manipur te an awm.

Mizoram erawhin first round an khel zo tawh a, Kerala an hneh loh avangin group dang inkhel result-ah an innghat mek.

Chutihrualin group IV leh group VI-ah hian eng result pawh thleng se final round lut tawh Delhi-in inelna an thlen chuan Mizoram pawhin final round an lut nghal ang.