Premier League - Khawvela football league ngaihven hlawh ber inṭan dan

European football-in ngaihven a hlawh a, Europe ram zingah pawh England an harh chhuak hmasa a, Premier League chu khawvela football league ngaihven hlawh ber ti hiala sawi theih a ni.

Premier League-ah hian Manchester United chu record nei ṭha ber an ni a, vawi 13 an champion tawh a. Chelsea (5), Manchester City (4), Arsenal (3), Blackburn Rovers (1) leh Leicester City (1) te an champion tawh bawk.

Football League First Division club-te thutlukna angin February 20, 1992 khan FA Premier League an din. Inelna ṭha zawk din an duh chhan hi kalphung mumal zawk bakah TV lam aṭanga sum chhenfak awm zawk awm thei tur an hmuh thiam vang a ni.

England hi 1966 FIFA World Cup-ah an champion a, English Football ṭhang chhoin 1970 aṭanga 1980s tir lamah a vul hle. Amaherawhchu 1980s tawp lamah inrelbawlna fel tawk loh avangin buaina an tawk chho a, hooliganism (Fan buaina siam ching, mi tawrawt tak) chuan harsatna a belhchhah.

Kum 1985 khan European Cup Final-ah Liverpool leh Juventus chu Heysel Stadium, Brussels-ah an inkhel a, Reds ṭantuten Italian club ṭantute te nena an inkar danna chu ti chhiain an va bei chiam. Buaina chhuak avangin mi 39 an thi a, mi 600 vel an hliam. He thil thleng avang hian English club chu kum nga chhung European competition khelh phalsak an ni lo a, Liverpool bik hi kum ruk atan hrem an ni bawk.

English club-in hremna an tawh avangin player ṭha tam takin Serie A leh La Liga an pan a, sum lakluh lamah pawh league dang an pha lo. Hei chauh hi a ni lo, April 15, 1989 khan FA Cup semifinal-ah Liverpool leh Nottingham Forest te an inkhel a, mipui innek buai avangin mi 96 zetin nunna an chan a, hliam 766 zet an awm - Hillsborough disaster tih a ni.

Kum 1990 erawh England tan kum ṭha a ni a, FIFA World Cup-ah semifinal an thleng. UEFA-in hremna a hlip a, Manchester United chu 1991-ah UEFA Cup Winners' Cup-ah an champion nghal. Hillsborough disaster aṭangin an inzir a, Lord Justice Taylor chuan mipui himna thlirin stadium zawng zawng chu mimal ṭhutna siam vek turin rawtna 

a siam.

Club lamin television rights aṭanga an sum hmuhah an lungawi lo a, stadium chei ṭhat an duh avangin First Division-ah an lungawi tawh lo. Kum 1990 khan khatih hun laia club lian panga Manchester United, Liverpool, Tottenham, Everton leh Arsenal te aiawhin London Weekend Television (LWT) managing director Greg Dyke an hmu a, hei Football League laka inlak hran kawngah a pui hle.

Amaherawhchu Football Association thlawpna an mamawh a, Arsenal neitu hlui David Dein chuan FA hi biain an hmathlir a hrilh. June 1991-ah FA chuan Premier League awm dan tur ruangam a ti chhuak ta a, a tak ram a hnaih sawt.

July 17, 1991-ah chuan FA Premier League atana inremna thuthlung chu ziah a ni ta a, he league thar hi  commercial chungchangah Football Association leh Football League lakah inrelbawlna hran a nei a. Chumi awmzia chu FA Premier League hian a duhthuin TV-a pekchhuah leh sponsorship chungchang a buaipui thei dawn tihna a ni.

Kum 1992-ah chuan First Division club-te chu Football League aṭangin an kal hrang a, Football League hnuaiah inelna pathum EFL Championship, EFL League One leh  EFL League Two te chauh a awm ta thung.

Premier League ṭantirh season hmasa pathumah club 22 an awm a, 1994-95 season-ah team pali an relegate. 1995-96 season-ah team pahnih chiah Championship aṭanga kai chho an awm a, tuna a kal dan ang hian club 20-in inelna hi kalpui ṭan a ni.