Alcantara-a'n chhuah a duh - Bayern chief

Bayern Munich chief Karl-Heinz Rummenigge chuan Thiago Alcantara-a'n German club chhuahsan a duh thu a sawi chiang. Nipui transfer hi July 27 aṭang khan a inṭan a, October 5 thleng a awh ang.

Rummenigge chuan, "Club sporting director Hasan Salihamidzic leh Thiago te ṭha takin an indawr a, contract thar pawh a beiseiawm hman hle. Amaherawhchu Thiago-a'n chona thar hmachhawn a duh a, kan pawm a ṭul," tiin Spanish midfielder Thiago Alcantara chu cham tura an hmin theih loh thu a sawi.

Kum 29 mi Thiago hi Barcelona youth system chhuak a ni a, Catalan club-ah nomawi chawi theih La Liga (2), Copa del Rey (1), Champions League (1), FIFA Club World Cup (1), Supercopa de Espana (2) leh UEFA Super Cup (1) te a chawi vek. Bayern Munich a pan hnuah pawh Bundesliga nomawi vawi sarih a chawipui tawh a, DFB-Pokal-ah vawi li an champion tawh bawk.

Thiago hi player talent nei ṭha bik a ni a, Under 17 leh Under 21 Euro C'ship-ah Spain a champion pui tawh a, kum 2013-a U21 Euro C'ship-a an champion ṭum phei chuan best player-a thlan a ni. Spanish midfielder hi Liverpool nen sawi zawm a ni a, Thiago hian Premier League champion tana khelh hi a châk nia hriat a ni bawk. Jurgen Klopp-a'n Thiago hi Reds squad tih chhahna atana a duh nih chuan pound maktaduai 30 tling loin a lak theih a beiseiawm.