Potter-a Chelsea an tho thei dawn em?

Todd Boehly leh a thawhpuiten May 30, 2022-a Chelsea an lei khan thil tum lian tak pakhat an nei - chu chu European football-a club langsar ber nih a ni a, Chelsea siam liantu, sumdawng hausa tawntaw Roman Abramovich ai maha hlawhtlinga Chelsea enkawl an tum.

Mahse, Boehly leh a ṭhianten thutlukna langsar tak, team nghawng thei thui tak an siam nghal a, chu chu Champions League-a Chelsea champion puitu, coach langsar Thomas Tuchel an ban kha a ni - September 7-a thil thleng a ni.

Boehly-a'n thutlukna siam kawngah harsatna a nei lo tih pholang zuiin, club lian la enkawl ngai lo leh player langsar la kaihruai ngai lo Graham Potter chu a tuk, September 8-ah a lalut nghal a, a tirah result an neih ṭhat avangin sawiselna pawh a awm lutuk rih lo.

Mahse, Krismas a her liam a, Kumthar chibai kan inbuk zawh meuh chuan Potter ban duhna au thawm hriat tur a awm ṭan a, Abramovich ngaih thu thlengin hriat tur a awm - zanin dar 1:30-ah Chelsea hian league-ah Fulham an lenchilh zui dawn a, ngaihven an hlawh hle.

A thlawn mai maw
Chelsea hian World Cup khelh a nih hmaa an league match hnuhnung pangaah chak an nei miah lo - vawi hnih a zawnin draw result an nei a, vawi thum an tlawm. Blues ṭantuten World Cup chawlh an nghakhlel a, an lo kir leh meuh chuan insiamṭhat hman an beisei.

London club ṭantute beisei ang ngeiin World Cup hnua an league match hmasa berah Chelsea hian mikhual Bournemouth chu 2-0 in an hneh nghal a, beiseina a vul thar. Mahse, mo thar ze thup rei thei lo ang chauh an ni a, Chelsea hlim chhung a rei lo.

Team naran tia chhal theih Nottingham Forest chu khualmualah 1-1 in an inhnehtawkpui a, Stamford Bridge-ah Manchester City chu 1-0 in an ngam lo bawk.

Chelsea hi Premier League table-ah 10-na an ni mek a, hmahruaitu Arsenal an phak lohna chu match 17 khelh tawhah point 19 ngawt a ni - champion chu sawi loh, season thara European football khelh pawh a harsa dawn.

Aw... bang mai la!
Chelsea hian Fulham an lenchilh hmaa an match hnuhnung ber chu FA Cup-ah an khel a, third round-ah Manchester City hmachhawnin, an mikhualna ramah 4-0 ngawtin an tlawm!

Blues ṭantuten an tiahpui laka dawl zawra an zawr chu an hrethiam lo a, Potter ban duhna thu an aupui a, club neitu hlui Abramovich ngaih vanga lunglen thu thlengin a ni an chhamchhuah ni.

Mahse, Chelsea board an nghing lo - khawthlang media-ten London club hian Potter an thlawp thu an tarlang a, hliam an ngah miau avangin English coach dinhmun hi an hriatthiampui niin an sawi.

Chelsea hian hliam vangin Reece James, Ben Chilwell, Wesley Fofana, N'Golo Kante, Raheem Sterling leh Christian Pulisic te an chhawr thei lo mek a, heti zat player inhliam neih hi chhiatpui tham chu a ni hrim hrim.

Beiseina thar
Zanina Chelsea lenchilh tur Fulham hi table-ah pasarihna an ni mek a, Blues aia match khata khel tamin point thumin an sang zawk bawk - London club tan zuam ngawt an fuh dawn lo.

Mahse, Chelsea tan thu lawmawm pakhat a awm a, Thawhlehni khan Ruben Loftus-Cheek chuan training a zawm a, Pierre-Emerick Aubemyang pawh a ṭhiante zingah a training lai hmuh tur a awm.

Thlasik transfer-a lakluh thar, AS Monaco aṭanga an lei defender Benoit Badiashile leh Molde aṭanga an lakluh striker David Fofana te pawhin club training an zawm tawh a, Fofana hian FA Cup-ah khan Blues tana a match hmasa ber a khel.

Player inhliam ngah Chelsea tan chuan hei ringawt pawh hi chanchin lawmawm a tling a, Fulham laka hnehna chanpui turin an ṭha tawk em, tih erawh zanin lama hriat tur chi a ni.

Chelsea beiseina
Potter leh Chelsea tana beiseina siamsaktu pakhat chu Fulham lam kim thei lo tur hi a ni - an kim lo dawn a ni satliah lo a, striker ṭha Aleksandar Mitrovic chu hliam vangin a inlan thei dawn lo.

Mitrovic hian Leicester City laka 1-0 a hnehna an chan ṭum khan tun season-a a yellow card pangana a hmu a, hei vang hian Chelsea a hmachhawn thei dawn lo.

Serbian striker hian tun season Premier League-ah match 15 khela goal 11 khungin, Fulham tlarhma chhuanvawr a ni a, a tel lo chuan season hmasaa Championship khel team hi an tlarhma a bil sawt ang.

Team pahnihin point thum mamawh ve ve mah se an dinhmun aṭanga tehin Chelsea-in chak an mamawh zawk, tiin a sawi theih a, a bik takin Potter-a tan a hna humhim turin tlawm a thiang tawh lo - Boehly leh a thawhpuiten European football khelh phak loa sum hloh a tamzia an hrethiamin a rinawm.