Chelsea-ah Joao Felix a lut

Club talbuai Chelsea tan lawmna tur a awm a, Atletico Madrid forward Joao Felix chuan season khat chhung loan-a khel turin London club hi a zawm.

Felix hian Stamford Bridge a pan hma hian Atletico-a a contract neih lai chu kum khatin a pawtsei bawk a, 2027 thleng cham turin contract a ziak.

Kum 23 mi forward hi Arsenal leh Manchester United pawhin lakluh an duh a, mahse, Portuguese forward hian Chelsea-a kal a thlang zawk.

Felix chuan, "Chelsea hi khawvela team ropui ber pawl a ni a, an tum ramte thleng tura ka puih theih ka beisei. He hmun ka rawn pan thei hi ka hlim takzet a, Stamford Bridge-a inkhelh ka châk tawh hle a ni," a ti.

Portugal tan vawi 28 inlana goal li khungtu Joao Felix hian kum 2019 khan, kum 19 mi lek niin khawvela footballer man to pangana ni turin Atletico a pan a, Spanish club hian a man atan Benfica hnenah pound maktaduai 113 an pe.

Spanish club tan inelna hrang hrangah match 131 khela goal 34 khungin, assist vawi 18 a nei a, World Cup khelh zawh takah pawh khan Portugal tana inlanin, match ngaah goal khat a khung.

World Cup zawh hnuah khan Atletico tan match hnih khel leh tawhin, Elche laka 2-0 a an chakna inkhelah goal khat a khung a, Barcelona laka 1-0 an tlawm khan minute 73 a khel bawk.

Atletico tan tun season inelna hrang hrangah match 20 khelin goal nga a khung a, assist vawi thum a nei - season hmasa ṭantir aṭanga chhiarin minute 101 dan zela La Liga-a goal emaw assist emaw nei ang a ni a, Real Madrid striker Karim Benzema (71) leh Ousmane Dembele (100) chiah a tluk lo.

Chelsea hian January transfer-ah Felix hma hian defender Benoit Badiashile, striker David Datro Fofana leh midfielder Andrey Santos an lo lalut tawh a ni.