Man United-in Weghorst an hnaih zel

Manchester United nena sawizawm Wout Weghorst chuan nimin khan Besiktas training a zawm lo a, Old Trafford pan a tum hle. Dutch striker Weghorst hian English club hi a zawm dawn a nih chuan United, Besiktas leh Burnley te an inrem vek a ngai.

Kum 30 mi Weghorst hi Burnley player a ni a, Besiktas-ah loan hmangin a khel mek. Clarets hian Turkish club nen an inremnaah tun season chhunga Weghorst laklet theihna an dah tel loh avangin Man United hian Besiktas an tihlawm tel a ngai.

Manchester United hi Besiktas nen hian a thuphungin euro maktaduai thumin (£2.7m) an inrem tawh a, amaherawhchu Turkish club hian Weghorst thlakna tur an hmuh chauhin transfer hi an kalpui dawn.

Weghorst hian Turkish league-ah match 16 khelin goal riat a khung a, Dutch striker thlakna tur hi hmuh a awlsam lo ang. Chutihrualin Erik ten Hag leh a hoten Janaury thlaah sum hman tur an ngah tawk lo a, player langsar la thei dinhmunah an ding lo. Hemi a nih avang hian loan hmanga 6ft 6in-a sang striker Weghorst lakluh hi chanchin ṭha a ni thei ang.