Bengal leh Maharashtra an chak chiang

Santosh Trophy vawi 76-naah West Bengal leh Maharashtra chuan nimin khan an khingpui an sawp ve ve. West Bengal hian Madhya Pradesh chu 5-0 in an sawp a, group IV inelna thlengtu Maharashtra-in Daman and Diu chu 4-0 in an sawp.

Chhatrapati Shahu Stadium-a inkhelah West Bengal tan Robi Hansda leh Naro Hari Shrestha ten goal hnih ve ve an khung a, Totan Das-a'n goal khat a khung bawk. Santosh Trophy-a record nei ṭha ber Bengal hian match thum an khelh aṭangin goal 13 an khung a, goal an la chhuah lo.

Maharashtra-in Daman and Diu an sawp theih nan Omkar Suresh Patil-a'n minute 10 chhung lekin goal hnih a khung a, Kaustubh Ravindra leh Rushikesh Ganesh Methe-patil ten goal khat ve ve an khung.

Group khatah hian team paruk an awm a, pakhatnain final round an lut nghal dawn. West Bengal leh Maharashtra te hi group match hnuhnung berah an inkhel dawn a, an pahnih intawn hmaa an chak vek a nih chuan an pahnih hian final round an lut dawn.

Mizoramin first round an khel zo tawh a, match hnuhnung bera Kerala an hneh loh bakah an goal difference a ṭhat tawk loh avangin inkhel dang result-ah final round an luh leh dan a la awm. Chutihrualin an group awmnaa pakhatna Delhi-in final round hi an thleng a nih chuan Mizoram pawhin final round an khel ang.