Hyderabad khelmualah Chennaiyin leng dawn

AFC Champions League khelh tum Hyderabad chuan zanin dar 7:30-ah Indian Super League match khel turin Chennaiyin an mikhual dawn a, league round hmahruaitu ni chunga season khar an duh chuan tlawm a thiang tawh lo.

ISL-ah top four chinin semifinal khelin, champion tur zawn ṭhin a ni a, hei hi Asian Football Confederation kalphungah a dik tawk loh avangin, champion aiin league round-a hmahruaitu chu Champions League khel turin an tling ṭhin.

Tun season ISL-ah Hyderabad che ṭha viau mah se anni aia che ṭha an la awm cheu a, an hming chu Mumbai City a ni. Mizo tlangval Lallianzuala Chhangte leh Lalengmawia Ralte (Apuia) te khelhna club hian league match 13 khelh tawhah tlawm an la nei miah lo.

Mumbai hian vawi 10 hnehna chang tawhin, vawi thum draw result an nei a, Hyderabad ai hian point hnihin an sang zawk - Nizams (Hyderabad sawina) hian match 13-ah vawi 10 tho hnehna chang mah se, vawi hnih an tlawm a, vawi khat draw an nei.

Tun hnaia Mumbai khelh dan thlir telin, Hyderabad tan chuan hmabak match-a chak zel hi tihmakmawh a ni a, zaninah pawh an mikhual lakah chak an tum dawn.

Chutihrual chuan Chennaiyin hi semifinal khelh tum an ni a, beisei a bo loh nan an chak ngei a ṭul - team pahnih squad leh chak an mamawh dan thlirin, zanin inkhel hi a hmuhnawm loh ring suh.

Hyderabad hian squad-ah Mizo goalkeeper Lalbiakhlua Jongte, midfielder Lalchungnunga Chhangte leh Mark Zothanpuia te nei mah se an kum a la nau deuh avangin hmun an la chang phak chiah lo a, Chennaiyin lam hian Mizo player kawl an nei

lo thung.

Pathianni zana Mumbai City-in 4-0 a Kerala Blasters an sawp hnuah khan ISL an chawl a, zan thum an awl hnuah zaninah match a awm leh dawn a ni.