United & Rashford an kal zel; League Cup-ah pawh an chak

Erik ten Hag hnuaia indinthar mek Manchester United chuan hnehna an chang leh ta a, inelna hrang hranga an match hnuhnung pariatah an chak vek.

United hian Thawhlehni zan khan Charlton Athletic chu League Cup quarterfinal-ah 3-0 in an hneh a, Erik ten Hag hnuaia nomawi chawi turin pen khat an pen leh ta - semifinal an lut.

Red Devils tan player 'form' tak Marcus Rashford chuan goal hnih a khung a, match ruk zet a zawna goal a khungna chiah a ni. Brazilian forward Antony chuan goal khat a thawh ve bawk - Rashford hian United tana mahni muala a zawna goal riat khung thei Wayne Rooney a nih rual chiah a, a zawna goal kua khungtu Dennis Viollet record a nih rual lo ang tih a sawi theih ta lo.

Thawhlehni zana League Cup quarterfinal inkhel dangah Newcastle United chuan Dan Burn leh Joelinton goal khung hmangin Leicester City chu 2-0 in an hneh a, hun tawp thlengin goal dang a lut tawh lo.

Thawnthu ngai

Ole Gunnar Solskjaer-a'n 2018-19 season laihawla Manchester United a enkawl khan a match hmasa pariatah hnehna a chanpui vek - mahse, hemi hnuah hian heti zat chak zawn hi an nei leh tawh lo reng.

Ten Hag a lo lang a, Dutch coach hian Red Devils muthlu mek chu kaihthawh tumin match riat a zawnin a chakpui ve leh ta. Old Trafford-a inkhelah United tan Antony chuan minute 21-na lekah goal hmahruai a khung a, Diogo Dalot thawhrah tiin a sawi theih.

Mahse, League One club Charlton Athletic lakah United hi chuti maia awlsamin an chak bik lo a, fans, 9000 nen zeta thawk chhuak, Premier League club ni ṭhin hian Red Devils tan awlsam takin kawng an hawng bik lo.

Mahse, Scott Fraser chuan Charlton tan si phurh sutna remchang nei mah se a chance neih hi a chhawr thei lo a, United keeper Tom Heaton tan harsatna a thlen thei lo.

A tawpah Rashford

United-in an beisei angin goal an khung zui lo a, Brazilian midfielder Fred chuan kawh zeta post a pet per bakah, Christian Eriksen-a chance neih duhawm chu Charlton keeper Ashley Maynard-Brewer chuan ṭha zetin a dansak bawk.

Mahse, Red Devils hian Marcus Rashford an nei a, English striker form em em mai hi a hun têah a inlar a, minute 90-naah Manchester United tana a match hmasa ber kheltu Facundo Pellistri siamsak chu goal-ah a chantir.

Rashford-a'n hun tawp hnaihah goal hmangin chak a nemnghet a, a la duhtawk lo cheu - hun pek belh minute linaah a khung leh a, referee-in hun tawp ham rik a ham meuh chuan 3-0 in an chak der.

Kum 25 mi Rashford tan season duhawm bik tiin a chhal theih a, tun season inelna hrang hrangah match 25 khelin goal 15 a khung der tawh a, assist vawi nga a nei bawk - Rashford hian United tana mahni muala a zawna goal riat khung thei Wayne Rooney a nih rual chiah a, a zawna goal kua khungtu Dennis Viollet record a nih rual lo ang tih a sawi theih ta lo. Hmabak erawh Manchester City an ni!

Ten Hag a lawm

United boss Erik ten Hag chuan, "Semifinal kan luh a ngai a, kan tum kan tihlawhtling a ni. Kha aia hmaa game kha titawp thei kan niin ka hria - kan tum ber erawh chak a ni a, kan chak miau avangin tun hi chu infak hun a ni," a ti.

Manchester United hian Premier League lamah fiahna hautak an hmachhawn zui dawn a, January 14, Inrinni zan dar 6:00-ah Manchester derby khel turin Pep Guardiola enkawl Manchester City an mikhual dawn.

United hian tun season-ah league match 17 khel tawhin, khelh zat inangah City hi point li chauhin an thlau a, Old Trafford-ah an chak thei a nih ngat chuan point khat chauhin pahnihna City an thlau dawn.

Premier League-ah Arsenal chu hmahruaitu an ni mek a, Mikel Arteta enkawl Gunners hian match 17-ah point 44 an nei tawh a, tun season-ah vawi khat chiah tlawm an la nei.

Magpies an chak

FA Cup third round-ah Newcastle United-in mualpho takin Sheffield Wednesday an ngam lo a, mahse, League One club laka an tlawm hnuin an insiamṭha lehnghal a, League Cup semifinal lut turin Leicester chu 2-0 in an hneh.

Magpies tan Dan Burn chuan minute 16-na lekah goal hmahruai a khung a, Joe-linton chuan second half-ah a belhchhah leh bawk - hun tawp thlengin goal dang a lut lo a, Magpies-in semifinal an lut.

Kum 30 mi Burn tan Newcastle tana a goal hmasa ber a ni - January 2022 khan a naupan laia a club ṭan ṭhin hi Brighton & Hove Albion aṭangin a zawm a, goal hial a khung ta.

Newcastle boss Eddie Howe chuan, "Burn ka lawmpui takzet a ni," a ti a, nizan khan League Cup quarterfinal inkhel dangah Nottingham Forest vs Wolverhampton Wanderers leh Southampton vs Manchester City an intawng a, he thu buatsaih a nih lai hian result kan hre hman lo.