Pogba a training ve leh ta

Paul Pogba chuan Thawhlehni aṭang khan Juventus training pangngai a zawm ve leh ta. Nikum September thla khan a khup hliam zai a ni a, a hliam vang hian France tan Qatar World Cup pawh a khel thei lo.

Old Lady chuan an midfielder training lai thlalak leh video chu social media lamah an tarlang, tun hnaia che ṭha chho tak Juve tan chuan an player ṭha dam ta hi chanchin lawmawm bik a ni ngei ang.

Nikum nipui bazar lai khan Pogba hian Manchester United aṭangin a club hlui Juve hi a zawm, season thar inbuatsaihna neih laiin a hliam a, hei vang hian Italian club tan season kal laiah match pangngai a la khel lo.

France international midfielder Pogba inkhelh pangngai theih hun tur tak sawi chian a la ni lo a, khawthlang media-te chuan tun thla tawpah a inlan theih an ring.

Italian chanchinbu lian La Gazzetta dello Sport erawh chuan February thla laihawla khelh tur Europa League playoff aṭanga a inkhelh an rin thu an ziak thung a ni.