Australian Open khelh châk Thiem

Dominic Thiem chuan Australian Open khelh a nghakhlel tih a sawi, season hmasa a hman ṭhat theih loh bakah kuminah bul ṭan fuh lo mah se, a tan Grand Slam inelna hmasa chu insiamremna hun ṭha a ni thei turah a ngai.

Austrian tlangval Thiem hian 2020 khan Australian Open final a lo khel tawh, mahse a chak lo zawkah a ṭang. Hliam vangin hun rei tak chhung a buai a, tunah chuan a dam fel chho ve tawh dawn niin a lang.

Mahse, inelna a hmachhawn hnuhnung ber Adelaide International 1-ah chuan hneh nei loin a zinkawng a tawp nghal, world ranking-ah pawh 99-na a ni phak hram a, a banrek dinglam hliam vanga thla riat a chawlh hnuah ngai a la awh leh thei lo.

US Open 2020 champion Thiem chuan, "Ka taksa a dam ṭha tawh, nikum khan beisei ang result la nei thei chiah lo mah ila ngai awh leh thei turin kawng dik ka zawh niah ka ngai, kuminah hian tun hma ang khan ka khelh leh theih ka beisei.

"Grand Slam khel turin ka inpeih tawh a, tunah hian eng ang taka ṭha nge ka nih tih pawh ka inhre chiang. Duhsak takin wildcard pek ka ni a, hei hi ka tan a hlu hle, a hlutna ang taka ka hman chhuah theih pawh ka inring.

"A pawimawh lai ber nia ka hriat chu hliam nei loa ka awm thei hi a ni a, taksa a inpeih chuan rilru hi chuan a cho reng," tiin Australian Open khelh a châk tawh a, inelna lian hi January 16 aṭangin Melbourne Park-ah khelh tur a ni dawn.