Curry dam tawh mah se GSW an chak lo

Hliam vanga NBA match 11 a khelh theih loh hnuah Stephen Curry a lo kir leh tawh a, mahse a club talbuai lai Golden State Warriors chu a chhan chhuak nghal thei mai bik lo - nimin zing inkhelah Warriors hian Phoenix Suns chu 125-113 in an ngam lo a ni.

Nikum December thla chawhma lam khan Warriors hi Indiana Pacers nen an inkhel, hemi ṭum hian Curry a chu a koki (shoulder) a hliam, a natna vang hian NBA regular season kal laiah match 15 ngawt a khel thei lo.

Kum 34 mi Curry hian a lo kir lehna inkhelah hian minute 31 chhung hun a hmang thei a, point 24 neiin assist vawi thum nei bawk mah se a team chakpui nan a tawk lo, anmahni khelmual Chase Center-ah ngei an tlawm.

NBA champion lai Golden State hi season kal laiah vawi 21 an tlawm tawh, an chak zat chu vawi 20 a ni thung. Western Conference table-ah pariatna an ni hram a, tun hnaiah a zawna vawi thum an tlawm avangin an dinhmun a ṭha lo.

Regular season aṭangin a tiṭha zual pariat chinin playoff an khel dawn. Curry leh Klay Thompson te awmna hi playoff khel lo thei an la ni reng tihna a ni a, an insiamṭha thuai a nih loh chuan an hna a hautak chho dawn hle.