NBA record siamtu Miami Heat

Miami Heat chuan NBA match khata free throw hlah miah loa lut hnem ber record thar an siam. Nimin zing regular season inkhelah Miami hian Oklahoma City Thunder chu 112-111 in an hneh.

Miami hian vawi 40 ngawt free throw an hmu a, an lut fai vek. Kum 1982 daih tawha Utah Jazz-in Portland Trail Blazers laka record an lo siam tawh, vawi 39 chu an khum ta chiah a ni.

Point 35 neitu Jimmy Butler chu Heat an chak theih nana thawhhlawk a ni a, a point neih zingah hian hun tawp hma minute 12 chauh awm tawha free throw a vawm luh pawh a tel a, hei hi an chakna point a ni tel nghal bawk.

Heat coach Erik Spoelstr chuan, "Season tir aṭangin free throw kan lut ṭha thei hle, tun inkhel bika kan chet dan erawh beisei phak bak a ni thung. Hlah miah loin kan lut kim ang tih hi chu ka beisei aia sang a ni," tiin a sawi.

Hun tawp hma minute khat pawh awm tling tawh loah Miami hi 111-106 in an la hniam zawk. Mahse, hun pawimawhah Victor Oladipo chuan 3-points a vawm lut a, khel ṭha tak Butler chuan lay-up hmangin a nih rual.

An chakna leh NBA record siam turin Butler chuan free throw a vawm lut zui leh a ni. NBA All-Star zinga vawi ruk tel tawh Butler chuan, "Sawi mai tur ka hre lo, point khat leka kan chak hi ka lawm," a ti.

James Harden chuan kum 2019 khan Houston Rockets tan match khatah, hlah miah loin free throw vawi 24 a lo lut tawh a, mimalah chuan Harden aia record nei ṭha an awm lo, a tluktu emaw a khumtu emaw nih pawh a awlsam lo ang.

Nimin zing NBA regular season inkhel dangah, Philadelphia 76ers chuan an khingpui Detroit Pistons chu 147-116 in an hneh ve bawk.