Parma lakah Inter an chak hram

Coppa Italia champion lai Inter Milan chuan last 16 paltlang turin vanneihna an mamawh tel. Thawhlehni zan inkhelah Inter hian extra time an khelh hnuah Parma chu 2-1 a hnehin an tlang hram.

Serie B club Parma tan Gianluigi Buffon a inlan, kum 44 mi goalkeeper hi malpui hliam vangin tun hnaiah a chawl deuh reng, nikum October thla hnua a inkhelh lehna hmasa ber niin hun rei tak chhung an goal a venghim.

Stanko Juric chuan chawlhlawk hma deuhin yard 25-a hla aṭangin goal hmahruai a khung a, khualmualah rin hlawh lo zawk Parma dinhmun a ṭha hman hle a, an ṭang tluan thei teuh takzet bawk.

Hun tawp hma minute hnih chauh awm tawhah Parma hian goal an chhuah. Inter striker Lautaro Martinez chuan si phurh a sut hram, extra time khelh niin Buffon-a ball hnek chhuah chu Francesco Acerbi chuan chakna goal ni turin a khung thung.

Italian legend Buffon chuan, "Kan suangtuahna tih hlawhtlin tumin theihtawp kan chhuah a, hnehna chan tumin kan theihna zawng zawng kan hlan, amaherawhchu kan thil tih kha hnehna chan nan a tawk zo si lo.

"Inkhela chak lo zawk nih hi chu engtik lai mahin a nuam ngai lo. Chutih rualin tun ṭum match ang hi chu a hluin a ropui, hetiang inkhel hautakah hian player hlutna pawh a lang chiang ṭhin," tiin a sawi.

Inter Milan coach Simone Inzaghi chuan, "Parma hian hun rei tak aṭangin inbuatsaihna an lo nei tawh a, an thawhhona a ṭhain an inveng thiam em em bawk, anni ang khelh hi chu engtik lai mahin a awlsam ngai lo tih kan hria.

"A bul ṭan ṭha tawk lo mah ila a hmawr kan bawk danah erawh ka lawm, chutihrualin ball kan chanin kan la che rang tawk lo a, vawi khat inthlahdah zeuh hian thui leh na takin nghawng a nei thei tih kan hriat pawh a ṭul," tiin a sawi.

Zanin dar 1:30 hian AS Roma leh Genoa ten last 16 match dang an khel chhunzawm ve leh ang. Jose Mourinho naute tan Serie A nomawi beisei ngam a harsa tawh a, an tan chuan Coppa Italia hi nomawi chawi theihna hnaivai a nih avangin an ngai pawimawh ang.

Roma tan Paulo Dybala-a'n season kal laiah beisei a phak rih lo, goal sarihah chuan inrawlh tawh mah se an lakluh laia an beisei ang chuan a la che lo. Argentina international hian zaninah a theihna lantir a tum ang.