Ka chawlh hun tur a hriat loh - Murray

Andy Murray chuan tun dinhmunah chuan tennis chawlhsan tumna a nei lo tih a sawi a, engtik hunah nge chawlh a tum tih pawh a sawi thei lo - nuam titaka inkhelh zel rih phawt a tum.

Khel bawr hliam vangin Murray hi a buai rei viau a, a infiamna ngainat ber hi a duh aia hmain a chawlhsan a ngai mai dawn ni pawhin a lang hman, mahse tunah erawh hnung lam a hawi leh ta rih lo.

Australian Open inbuatsaihna zinga mi Kooyong Classic-ah Murray hian China tlangval Zhang Zhizhen chu 2-6, 6-3, 10-2 in a hneh. Janaury 16 aṭanga khelh tur Australian Open-ah pawh qualifier khelh hah ngai loin main draw a khel dawn - hei erawh wildcard an pek vang a ni.

Kum 35 mi Murray chuan, "Tun hnai thla sarih chhung chu ka hriselna dinhmun a ṭha khawp mai. Hun rei tak chhung min tibuai tawhtu hliam leh natna te kha ka hre ta lo a, hei ringawt pawh hian nun a tinuam.

"Nuam titaka training ka neih a, hlim taka tennis ka khelh theih chhung chu inkhelh ka duh. Inkhelh chawlhsan hun tur ka sawi thei lo a, hemi kawngah chuan ruahmanna pawh ka nei hran lo," tiin a sawi.

Britain tlangval hian Grand Slam nomawi pathum a chawi a, a vanglai chuan world number 1 hial a ni phak - an ram khawpui London-in Olympic a thlen ṭum khan gold medal a vaw chhuak hial.

Mahse, player ropui bik Roger Federer, Rafael Nadal leh Novak Djokovic te nen an hun tawn a inrual chho a, a ropui tur angin a ropui tawk lo deuh tia sawi theih a ni, chutihrualin a sulhnu erawh a ṭha thawkhat hle.