India tan Kohli leh Rohit

India chuan Sri Lanka nena ODI match thum an khelh tura match hmasa berah 67 runs-in hnehna an chang a, captain kal chhuak ta Virat Kohli chuan 113 runs siamin captain ni lai Rohit Sharma chuan 83 runs a siam bawk.

Men in Blue leh Lions hian vawiin tlai dar 1:30 hian Eden Gardens-ah match hnihna an khel leh ang a, match thumna hi January 15, Pathianni hian Greenfield Stadium, Trivandrum-ah an khel ang.

Ball vuak thiam

Barsapara Stadium, Guwahati-ah Sri Lanka-in vawm hmasak an thlang a, India-in an ball vuak an thiamzia pholan nan an hmang.

Captain Rohit-a'n bul ṭanin 83 runs a siam a, a kawppui Shubman Gill-a'n 70 runs a siam bawk. India opener-te pahnih inkawp hian 143 runs an siam avangin mualneitu hi dinhmun ṭha takah an ding.

Gill aia rawn lut Virat Kohli a rawn che ṭha a, ball 87 lekah 113 runs a siam. Kohli hian ODI-ah century vawi 45 a siamna a ni a, century vawi 49 siamtu Sachin Tendulkar chiah tluk lo a nei tawh a ni.

ODI-a century siam tam panga zinga pathum hi Indian batter vek an ni a, Tendulkar leh Kohli bakah Rohit pawh a tel. India captain hian century vawi 29 a siam a, a chung chiaha awm Ricky tluk turin century vawi khat siam chiah a mamawh tawh.

India hian over 50-ah 373 runs an siam. Guwahati-ah Indian batter-te an vul a, Sri Lanka bowler-te an che thei lo.

A tam mah mah

Sri Lanka bat hun a thleng a, opener Pathum Nissanka-a'n 72 runs siam bawk mah se a kawppui Avishka Fernando-a'n run nga bak a siam lo. Amaherawhchu captain Dasun Shanaka-a'n 108 runs rawn siamin Sri Lanka mualpho tur a hliah khuh.

Lions hian over 50-ah 306 runs an siam a, 67 runs-in target 373 runs an pha lo. Sri Lanka tan target a tam mah mah. India tan Umran Malik-a'n wicket thum a la a, 52 runs a pe. Mohammed Siraj pawhin 30 runs pein wicket hnih a la bawk.