Marin lakah Sindhu a chak lo

PV Sindhu chuan a ngam loh fo tawh, a bik takin inkhel pawimawha a hneh hleih theih loh Carolina Marin bawk a hneh lo. Nimin khan Indian nula hi Marin lakah hian 12-21, 21-10, 15-21 in a chak lo.

Kuala Lumpur-ah Malaysia Open Super 1000 khelh a ni a, hun rei tak chhung a inkhelh loh hnuah Sindhu a lo kir. Thla nga zat a chawlh hnua lo kir ni mah se a khel thei angreng phian, mahse player ṭha bik Marin hneh nan chuan a tawk zo lo a ni.

Player ropui pahnih hi vawi 15 an inhma-chhawnna a ni a, world number 1 hlui leh Olympic gold medal la tawh Marin hi vawi 10 chak tawhin record a nei ṭha viau a, inelna dangah pawh an la intum chhunzawm leh ngei ang.

Mipa singles lamah HS Prannoy chuan a khelh ṭhat a chhawm nung zel. Prannoy hian amah ang bawka Indian player Lakshya Sen chu 22-24, 21-12, 21-18 in a hneh, a match lehpekah chuan Chico Aura Dwi Wardoyo leh Hans-Kristian Vittinghus te inkhela chak zawk a tum leh ang.