FA Cup Final Arteta-a Arsenal hmaah Lampard-a Chelsea

Football knockout tournament upa ber FA Cup final chu zanin dar 10:00 hian Wembley Stadium-ah khelh a ni dawn. Champion ngun ber Arsenal leh tun hnaia record nei ṭha Chelsea an inhmachhawn ang.

London Derby a nih avangin a hmuna entu awm lo mah se inkhel boruak a sang leh dawn. Mikel Arteta leh Frank Lampard tan manager hna an thawh hnua an nomawi hmasa ber a nih theih ve ve avangin chak zawk nih an tum ruh dawn. Player a nih laiin Lampard-a'n FA Cup nomawi vawi li a chawi a, zanina a hmachhawn tur Arteta hian vawi hnih a chawi thung. Manager an nih hnuah erawh eng nomawi mah an la chawi lo, inkhelh banah pakhat zawk chuan 'nomawi pakhat' tia sawi tur a nei dawn tihna a ni.

Arsenal hian Premier League bikah chuan tun hnai kum 25 chhunga season an hman chhiat ber ṭum an tawng, pariatna an nih avangin European football an khel phak dawn lo. FA Cup champion an nih erawh chuan Europa League-ah an inlan ang.

Gunners manager Arteta chuan, "Arsenal hian thil engkim a ṭha ber zel a phu, eng inelna pawh ni se nomawi chawi turin theihtawp kan chhuah ang," a ti. Europe ticket neih nan champion an duh a, chutih rualin player lian chelh leh hip nan an duh zual bawk. Spanish manager hian defender Shkodran Mustafi leh keeper Bernd Leno te chu hliam vangin a la chhawr thei dawn lo. Pierre-Emerick Aubameyang, Alexandre Lacazette leh Nicolas Pepe te inkawp hi champion pui tham an ni em tih fiah a ni dawn.

An tlarhnung a phui lo tih mai loh chu Chelsea inkhel a hmuhnawm a, manager Lampard-a'n fak a hlawh viau. Chutihrualin hna thawk ṭha ni tur chuan nomawi a pawimawh - Gunners a hneh a nih chuan English manager hian fak a hlawh zual ang.

Lampard-a'n Blues a enkawl tir lama a rin ngam loh Olivier Giroud a ring tawh. France international hian semifinal-a Manchester United an hneh ṭum pawhin goal a khung. Lampard-a'n, "A phu ang ngeiin khelhna hmun a chang," tia a fak striker hian a club hlui a hmachhawn ngei a rinawm. Goalkeeper manto ber Kepa Arrizabalaga-a'n tih sual a ngah avangin manager rinna a hloh a, si ban nghak turin Willy Caballero a din zawk a rinawm. Hliam tenau nei Christian Pulisic leh N'Golo Kante an dam tawh a, winger Willian-a'n Blues jersey ha chunga a match hnuhnung ber a khel tura ngaih a ni bawk.