League Cup aṭangin Man City an tla

Manchester City chuan Carabao Cup quarterfinal-ah Premier League mawngphaha awm Southampton 2-0 in an hneh lo a, season khata nomawi pali chawi beiseina a tawp.

St. Mary's Stadium-a inkhelah Saints tan Sekou Mara leh Moussa Djenepo ten first half-ah goal an khung. Pep Guardiola-a'n second half-ah Kevin De Bruyne, Erling Haaland leh Rodri te luhtir mah se result a danglam phah lo.

An indah ṭha
Pep Guardiola-a'n Southampton lakah Erling Haaland, Riyad Mahrez, Kevin De Bruyne, Bernardo Silva, Rodri, Nathan Ake, Manuel Akanji leh Ederson te a dah a, Inrinni zana khelh tur Manchester derby atan a indah ṭhaah a ngaih theih.

Chutihrualin bul ṭantu zingah Aymeric Laporte, Kyle Walker, Joao Cancelo, İlkay Gündogan, Kalvin Phillips, Jack Grealish, Julián Álvarez leh Phil Foden te an la tel thei a, player ṭha tak vek an ni.

Keeper Stefan Ortega, defender Sergio Gómez leh midfielder Cole Palmer te an langsar lo deuh a, chutihrualin bul ṭantu hrim hrim thlirin Man City hi chak ngei tura ngaih an la ni tho.

Goal mawi
Southampton-in mualneitu an ni tih an lantir a, Premier League champion lai Man City an hmachhawn chungin huai takin an nawr ngam. Guardiola hoten goal zawnah vawi khatmah an pet theih loh laiin Saints-in goal hnih an khung thei a, goal chance pawh an ngah.

Saints winger Moussa Djenepo chu City tlarhnung tan hnawksak a tling a, box pawn aṭanga defender Duje Caleta-Car ball pet pawh keeper Ortega-a'n a dang hram.

French forward Mara-a'n hun ṭha a bawhpelh hnuah ṭha zetin minute 23-naah goal hmahruai a khung. Kum 20 mi Mara hian July khan Bordeaux aṭangin English club hi a zawm a, Saints tana a goal hmasa ber a ni.

Minute 28-naah goal mawi dang hmuhin a awm a, Djenepo chuan box pawn aṭangin keeper Ortega a rep. German keeper Ortega a chhuak hma hret a, a mualpho phah bawk.

Second half-ah Man City-in player ṭha an luhtir a, an goal bawh na hret mah se Saints tlarhnung an ṭhiat thei lo. Guardiola hote quarterfinal-ah an tla a, an hneh loh chu Premier League mawngphaha awm mek a ni.

Team ṭha zawk
Man City manager Pep Guardiola chuan, "Team ṭha zawk an ni a, an khel ṭha zawk. Bul ṭan tur player ka thlan sual vang lam a ni lo a, kan khelh ṭhat loh ṭum a ni," tiin a sawi.

Second half-a De Bruyne leh Haaland te luh hnuah pawh City-in goal zawnah ball an pet thei lo a, an khel ṭha lo hrim hrim. Chutihrualin City khelh chhiat chhan hi, Saints khelh ṭhat vang a ni bawk.

Southampton hian November 7 khan manager Ralph Hasenhuttl an ban a, a thlaktu Nathan Jones hnuaiah league-ah khel ṭha lo mah se knockout competition-ah an che ṭha.

Saints hian FA Cup-ah Crystal Palace an hneh a, League Cup-ah semifinal hial an thleng ta bawk. Premier League-ah erawh Saints hian chak chu sawi loh, point an hmu lohna hrim hrim pawh a rei tawh. Nikum October 29 aṭang khan an la chak lo char char a, Pathianni zanah Everton an hmachhawn dawn. Club pahnih hi relegation zone-ah an awm ve ve a, inkhel pawimawh a ni ang.