Man United khingpui tur Forest

Manchester United chuan Carabao Cup semifinal-ah Nottingham Forest an hmachhawn dawn a, inkhel pakhat zawkah Newcastle United leh Southampton te an inhmachhawn bawk ang.

League Cup semifinal hi double leg-a khelh a ni dawn a, first leg hi January 24/25, 2023-a khelh tur niin second leg hi January 31/February 1, 2023-a khelh tur a ni thung.

Manchester United hian semifinal thleng turin Aston Villa (4-2), Burnley (2-0) leh Charlton Athletic (3-0) te an hneh a, fixtures hautak tia sawi tur a awm lo. Tun hnai kum 10 chhunga League Cup-a record nei ṭha lawrlak Manchester City an tlak avangin Man United tan nomawi chawi theihna kawng zau tak a inhawng.

Kum 2017 hnuah Man United hian nomawi an chawi tawh lo a, Jose Mourinho hnuah nomawi an la chawi leh lo. Erik Ten Hag-a hnuaiah Premier League thlengin champion theihna kawng a la inhawng a, League Cup-a an champion theih chuan inrintawkna pawh an ngah sawt ang.

Man United hian Nottingham hi December 27 khan 3-0 in an hneh a, League Cup semifinal-ah pawh rinkai zawk an ni ang. Chutihrualin Newcastle United an la awm avangin Ten Hag-a hote tan nomawi hi hmin sa a ni lo.

Magpies hi Eddie Howe hnuaiah nasa takin hma an sawn a, season thara Champions League khel tur khawpin an che ṭha. Newcastle khingpui tur Southampton hi Premier League table mawngphaha awm an ni a, Magpies buk rit zawk mah se Saints hian Man City an hneh!