Forest chhanhimtu Henderson a vanduai

Nottingham Forest-in League Cup quarterfinal-ah Wolves hnehin semifinal an lut. Forest chhanhimtu hi goalkeeper Dean Henderson a ni a, English keeper hian semifinal-ah amah neitu Manchester United a hmachhawn dawn avangin a khel thei dawn lo.

City Ground-ah Wily Boly hmangin minute 18-naah mualneituin goal an khung a, Boly hian a club hlui laka a goal khung hi a lawm duh lo. Wolves goal bawh a na a, keeper Henderson-a'n goal ngei tura ngaih ṭum hnih a dang.

Mahse, minute 64-naah Wolves-in Raul Jimenez hmangin Wolves-in siphurh an sut a, keeper Henderson tan dan ngaihna a awm lo. Minute 90 zawhah 1-1 a ni a, extra time awm loin penalty shootout hmangin chak zawk zawn a ni.

Henderson-a'n Wolves tana pet hmasa ber Ruben Neves leh pet hnuhnung ber Joe Hodge te penalty pet a dan sak a, Forest hi 4-3 in an vannei. Steve Cooper-a hote hian semifinal-ah Man United an hmachhawn dawn a, keeper Henderson-a tel loin an khelh a ṭul dawn a ni.