Aizawl FC khingpui tur Mohammedan

Vawiin tlai dar 4:30 hian Aizawl FC-in Kishore Bharati Krirangan-ah Mohammedan SC an lenchilh dawn. I League khelh mekah Mizo club hian point 13 an hmu a, Kolkata club hian point 12 hmuin an inthlauhna hi point khat chauh a nih avangin an inkhel tur a pawimawh hle.

Mizo club coach Caetano Pinho chuan, "Mizote hian theihna sang tak an nei a, inkhelh hrim hrim chu zirtir ngai loin an thiam sa. Ka tih tur chu an thiamnate a hmanna tur hrilh a ni," tiin Mizo player-te a fak.

Pinho match hnunhnung bera Real Kashmir nen goal awm loa an inhnehtawk ṭumin bul ṭantu zingah Mizo player pakua a thlang. Tun season-a an hmachhawp sawi chhunzawmin Pinho chuan, "Parukna china kan awm theih ka beisei a, hei aia sangah pawh hian kan awm thei ang," tiin a sawi.

Aizawl FC hi pasarihnaah an awm mek a, Mohammedan hi an hneh thei a nih chuan season tawpa parukna china awm hi a har lo ang. Amaherawhchu Mohammedan hi Trinidadian striker Marcus Joseph-a awmna a ni a, season liam ta khan pahnihna an nih phak bawk avangin an mualah phei chuan khelh an harsa dawn.

Nimin khan I League club-te intluk tawkzia a lang leh a, pathumnaa awm mek Real Kashmir chuan Sudeva Delhi lakah point khat an hlawh chhuak hram. Sudeva hian Seilenthang Lotjem hmangin minute 53-naah goal an khung hmasa a, Kashmir club hian injury time-ah pawh minute nganaah substitute Samuel Kynshi hmangin siphurh an sut hram.