Man United striker thar Weghorst

Manchester United chuan Wout Weghorst chu Burnley aṭangin loan-in an hawh dawn. Dutch striker Weghorst hian nimin khan medical nei turin Turkey aṭangin Manchester a pan a, he thu i chhiar meuh chuan United-in an tlangzarh tawh hial ang.

English club hian Weghorst an lak theih nan hian Besiktas hnenah euro maktaduai thum (£2.5m) an pe ang a, tun season khelh hmabak atan Clarets aṭangin an hawh dawn. Turkish club hian Weghorst neitu Burnley ni loin Man United aṭangin pawisa hi an dawng ang.

Besiktas hian Weghorst hi a thlakna tur an neih phawt loh chuan an tum lo a, amaherawhchu Al Nassr aṭanga Vincent Aboubakar an lak theih dawn avangin Dutch striker hi chhuah an remti.

Weghorst hian Besiktas tan hian match 17 khelin goal riat a khung a, assist vawi li a nei bawk. Turkish club hian loan hmangin Weghorst hi an la ringawt lo a, season tawpa euro maktaduai 10-a lak theihna an neih bakah Clarets hian season laihawla laklet theihna an neih loh avangin Man United-in zângnadawmna an pek a ṭul phah a ni.

Dutch striker Weghorst hian Premier League-ah hming a la chher lo a, nikum January khan Clarets hi zawmin match 20-ah goal hnih chiah a khung. Burnley an relegate zui avangin Weghorst hian loan hmangin Turkey a pan a, Premier League-ah hming chherna remchang a nei dawn.

Man United ṭantuten Weghorst hi Burnley tana a khelh dan vanga tui lo a nih pawhin Qatar-a a goal khung avangin an ngaizawng thung ang. FIFA World Cup khelh zawh takah khan Weghorst hian champion zui ta Argentina lakah goal hnih a khung a, hming a chher hle.