Nadal leh Medvedev inhmachhawn thei dawn

Rafael Nadal leh Daniil Medvedev te an kaltluang a nih chuan Australian Open quarterfinal-ah an inhmachhawn thei dawn. Nadal hi seeded pakhatna pek a ni a, a match hmasa berah chuan British player Jack Draper a hmachhawn ang.

Kumin Australian Open-ah hian world number 1 Carlos Alcarez chu hliam vangin a inlan dawn lo, hei vang hian world number 2 Nadal chu seeded pakhatna a nih theih phah a ni.

Kum 21 mi Draper chuan, "Rafa hi player ropui berte zinga mi a ni a, ani nen kan inhmachhawn tur hi ka tan chuan a lawmawm. Tennis huanga thil ropui tawn kan duh a nih chuan ani ang hi kan hmachhawn a ngai," a ti a, theihtawp a chhuah tur thu a sawi bawk.

Russian tlangval Medvedev hi seeded pasarihna pek a ni thung a, ani hian a bul ṭan nan American player Marcos Giron a hmachhawn thung a, tunlai a khelh dan thlir chuan harsa vak loa a chak theih a rinawm.

Mipui ngaihven tur bik zingah Novak Djokovic a tel. Serbian star hian a kaltluan chuan quarterfinal-ah Nick Kyrgios a hmachhawn thei dawn thung, anni pahnih hi hmanni lawka Wimbledon title inchuh tawhtute bawk kha an ni.

Hmeichhe singles lamah world number 1 leh seeded pakhatna ni bawk Iga Swiatek chuan Jule Niemeier a tum dawn. Grand Slam vawi thum champion tawh Swiatek hi a chak zek a nih chuan quarterfinal-ah Coco Gauff an tum dawn, anni pahnih hi 2022 French Open final-a inkhel te kha an ni.

Tennis season khat chhunga Grand Slam hmasa ber Australian Open hi January 16, Thawhṭanni aṭangin Melbourne Park-ah khelh ṭan tur a ni ang.