India awmpui Kyrgyz Republic leh Turkmenistan

Nimin khan Women’s Olympic Football Tournament 2024 khel tur zawnna fixtures chu AFC House, Kuala Lumpur-ah pawh a ni a, India hmeichhe team chu Kyrgyz Republic leh Turkmenistan te nen group G-ah an awm.

Asia aṭanga Olympic khel tur zawnna round 1-ah hian team 26 an tel a, group sarihah ṭhendarh an ni. Group tin aṭangin pakhat zel hi round 2 khel turin an tling ang a, he round-ah hian North Korea, Japan, Australia, China PR leh South Korea te chu an awm sa.

Round 2-ah hian team 12 chu group pathumah ṭhendarh an ni ang a, group hmahruaitu pathum bakah pahnihna zinga ti ṭha ber chu round 3 khel turin an tling dawn. Round 3-ah hian team pali chu pawh an ni leh ang a, home leh away hmanga an inkhelh hnuah a chak zawk ve vein Olympic khelhna tur Paris an pan ang.