Goal nen Messi a lo kir leh ta

Argentina tana FIFA World Cup a chawi hnuah Lionel Messi chuan Paris St-Germain tan match a khel ṭan ve leh ta a, goal a khung leh nghal. Paris club hian an mikhual Angers chu 2-0 a hnehin Ligue 1 hmahruaitu an nihna an ti nghet.

Kum 35 mi Messi hi chawlh pek rei bik a ni a, World Cup khel ve tho player ṭhenkhat chuan December thla khan club an zawm tawh a, tun thlatir lama zawm an awm bawk - Messi erawh Nilaini zan khan a inlan ve leh chauh.

PSG forward hian mawi taka ball a sem kual hnuah box chhungah a tlan lut a, box kil sir aṭangin a ke dinglam hmangin goal a khung. Messi bakah hian Hugo Ekitike chuan a khung bawk a, forward Neymar khung erawh offside vanga hnawl a ni thung.

French champion PSG manager Christophe Galtier chuan, "Kan hnungah hian kan chetsual chang an awm reng a, chuvangin fimkhur takin kan chet a ngai. Angers kha team inkhairual leh hlauhawm an nih bawk avangin ruahmanna pawh fel tak kan nei.

"Match hnih a khelh theih loh hnuah Neymar a lo kir a, chanchin ṭha a ni. World Cup hnuah Leo kan hmu leh ta bawk, ball a chan apiang khan fans lam an phurin an thawm a ring thei hle, an hmuh duh tak goal a pek let avangin an lawmna a zual ang," a ti.

PSG hian Pathianni zanah Rennes an lenchilh leh nghal dawn, league match 18 an khelh aṭanga point 47 hmuin table chung berah an awm, an hnuaiah hian point 41 neitu Lens an awm bawk - an inkarah point ruk chauh a awm.

Inkhel dangah Nice chuan Montpellier chu 6-1 in an sawp. Nice tan hian Arsenal aṭanga loan hmanga an hawh lai Nicolas Pepe leh England midfielder Ross Barkley te chuan goal hnih ve ve an khung a, Kephren Thuram-Ulien leh Andy Delort ten an khung bawk.

Arsenal player man to ber Pepe leh Chelsea midfielder hlui Barkley bakah hian Aaron Ramsey an nei bawk a, season ṭha tak hmangtu Nice hi team ṭha pangngai tak an ni a, goalkeeper Kasper Schmeichel leh defender ṭha Joe Bryan leh Mads Bech Sorensen te an la nei bawk.

Player langsar nei tam mah se Ligue 1 team 20 inel zingah a laihawl luahtu chauh an ni phak a, hei bakah hian French Cup last 64-ah third division club Le Puy Foot 43 an hneh lo, hei vang hian coach Lucien Favre an ban hial.

Favre an ban hnuah Didier Digard chuan team a enkawl lailawk a, ani kaihhruaina hnuaiah hian Montpellier lakah inkhel hmuhnawm chhawpchhuak chungin point thum hlu tak an hlawh chhuak a ni.