Naomi Osaka-i a rai

Grand Slam vawi li champion tawh Naomi Osaka chuan a rai tih a sawi a, kumin chhungin a inkhelh theih a rinawm loh - Australian Open 2023 pawh a khel dawn lo tih a chiang tawh.

Japanese nula hian nikum September thla hnuah match a la khel leh lo, tun kartir khan Australian Open aṭangin a inhnukdawk tih a sawi a, tournament a khelh loh chhan tur tak hi a tirah a sawi lo thung.

World number 1 hlui Osaka chuan, "Kumin chu ka tan zirlai thar hlir a ni dawn. Hringnuna chona hautak ber tura ngaih a ni dawn a, chutihrualin chona phurawm leh a hlimawm lai ber a ni dawn bawk.

"Hringnun hi a rei lo a, chuvangin kan chunga thil thleng engkim mai hi lawmna tur niah ka ngai. Ka duhthusam zinga thil pakhat chu, ka fa hian ka tennis khel lai en hman se, ani chuan chhuang takin, 'Inkhel lai saw ka nu a nih saw,' tiin sawi se ka duh," a ti.

Osaka hian khawvel hriat a hlawh hma, tunah hian kum 25 mi chauh la ni mah se major title pali a nei fel der tawh. Grand Slam nomawi a chawi hnuhnung ber chu 2021 Australian Open kha a ni thung.

Taksa bakah rilru lam damlohna vangin hun rei tak chhung tennis a khel mumal lo, ngai a awh chho leh dawn nia a lan hnuah nau a pai chhunzawm leh ta rih a, player ropui bikte huanga inhlangkai tur chuan a harsa tawhin a rinawm.