FFF president Noel le Graet a chawl rih dawn

French Football Federation president Noel le Graet chu a hna aṭangin a chawl lailawk dawn a, FFF chhungkuaa mipat hmeichhiatna lam hawia mawi lo taka chetna leh midang chunga pawi khawihna awm nia sawi sorkarin a chhui chian avangin Le Graet hi a chawl rih a ni.

French sorkar chuan FFF chhungkuaa thil thleng duhawm lo chungchangah hian French football thuneitu sang ber hi October aṭang khan a lo chhui tawh a, FFF chuan puh an nihna hi an pha thung.

Le Graet hi mipat hmeichhiatna lam hawia mawi lo taka chetna chungchangah tun hma pawhin a lo mualpho tawh a, tun hnaiah mawi lo taka Zinedine Zidane chungchang a sawi avangin a hna aṭanga chawl tura nawrna a nasa hle bawk.

Kum 81 mi Le Graet hian France football team enkawl tur anga sawi, an ram legend Zidane chuan phone hmanga biak tum pawh ni se, a call a lak loh tur thu tham lo takin a sawi a ni.

Le Graet hian a hnuah a thusawi avang hian ngaihdam a dil a, mahse, France forward Kylian Mbappe leh sports minister Amelie Oudea-Castera chuan na takin an khak hman - FFF ethics committee hotupa Patrick Anton chuan bang turin Thawhlehni khan a nawr hial!

FFF chuan thuchhuah siamin, Nilaini khan executive committee hmanhmawh an ṭhut thu an sawi a, he ṭhutkhawmah hian Le Graet chuan a chanvo chelh lai kalsan hi a remti a ni. Le Graet rual hian FFF director general Florence Hardouin pawh inven nan an suspend bawk.

Le Graet leh Hardouin awm loh laiin FFF deputy vice-president Philippe Diallo chuan an hmun ruak a lo luah lailawk dawn a, sorkar chhuichianna hi beisei dan chuan tun thla tawp lamah a chhuah hman beisei a ni.

Hetihlai hian France sports minister Amelie Oudea-Castera chuan, FFF chu an kih hnawh thilah mawhphurhna la ngam turin a lo ti ve mek bawk - So Foot magazine chuan FFF chhungkaw buaina hi an lo tarlang hmasa tawh a, hemi hnuah hian sorkar inrawlhin Oudea-Castera hian zirchiang turin a ti.

So Foot magazine chuan Noel le Graet hi FFF-a hmeichhe hnathawkte chunga mawi lo taka cheah a puh a ni.