Everton neitu Moshiri-a'n Lampard a thlawp

Premier League club Everton neitu Farhad Moshiri chuan coach Frank Lampard leh club director te chungah a rinna a la nghah tlat thu a sawi a, English coach ban duhna thawm ring mah se Chelsea legend a chhan tlat.

Everton Fans' Forum-te chuan club neitu Moshiri hnenah hian open letter an thawn a, club chhungkuaah inthlak danglam a ṭula an hriat thu an sawi.

Merseyside club hian Inrinni zan dar 8:30-ah anmahni ang thoa talbuai Southampton an mikhual dawn a, fans ṭhenkhat chuan Saints nena an inkhelh zawhah hian lungawi lohna lantir tumin ruahmanna an siam. 

Mahse, Moshiri chuan, "Kan manager hnathawhah hian rinna ka nghat a ni mai lo a, director of football Kevin Thelwell leh board of director te chungah rinna ka nghat bawk," tiin fan-te hi a chhang a, thlak danglam a tum loh hmel hle.

British-Iranian sumdawng hausa Moshiri chuan, "An chungah mawlmang takin rinna ka nghat ngawt lo - Everton training ground Finch Farm-a hnathawh leh Royal Liver Building (Everton office) a an hnathawh dante, ruahmanna an neihte hre reng chungin an chungah hian rinna ka nghat a ni.

"Kan club hian thiamna, tawnhriat leh tih tak takna thinlung kan nei tlat a, league-a kan dinhmun mekah hian hmasawn kan ngai tlang tih erawh kan pawm vek a ni," a ti.

Everton hi an league match hnuhnung parukah vawi li an tlawm tawh a, League Cup leh FA Cup-ah beisei tur an nei lo bawk - league table-ah 18-na an ni mek a, Inrinni zanah a mawngphah luahtu Southampton an ngam loh leh ngat chuan Lampard duh lohna thawm a ri ring lehzual ang.

Moshiri chuan, "Fans leh club te nen kan duhthusam a inang tlang - chu chu Everton ṭha zawk din a ni a, nasa takin hma kan sawn thei ang, tih ka ring tlat.

"Fan-te nena kan inpawh tlan a, an thurawnte kan lak theih nana, forum telna Fan Advisory Board kaltlanga inbiak hona neih ṭhin pawh a ṭha ka ti," a ti a, fan-ten club ṭhatna turah hmun pawimawh zawk chang se a duh.

Kum 44 mi Lampard hian inkhelh a chawlhsan hnuah coaching lam a luhchilh a, Everton hma hian Derby County leh Chelsea lo enkawl tawhin sulhnu ropui tia chhal tur hnutchhiah a la nei lem lo.

Everton hi January 2022 khan enkawl ṭanin, match 42-ah vawi 12 hnehna a chanpui a, vawi riat an khingpui inhnehtawkpuiin, vawi 22 zet an tlawm.