Napoli mualah Juventus
Serie A hmahruaitu Napoli chuan zanin dar 1:15 hian tun hnaia khel ṭha thei tak Juventus an lo mikhual dawn. Naples club hi an chak a nih chuan champion tura rinkai an ni chhunzawm ang.
Mahse, Old Lady zawk an chak a nih erawh chuan, hmahruaitu leh pahnihna inkarah point li chauh a awm tawh dawn tihna a ni a, league nomawi inchuh boruak a nung thar ang a, tu team zawk tan pawh champion theihna kawng a inhawng zau dawn.
World Cup hnu an match hmasa berah Napoli hian Inter Milan an ngam lo, a hnuah erawh Sampdoria hnehin an dinhmun an siamṭha lehnghal. Tlar hmaah Victor Osimhen leh Khvicha Kvaratskhelia te an nei a, anni pahnih hi Juve tlarhnung tana buaipui tham an ni ang.
Anni pahnihin tun season inelna hrang hrang an goal khung belhkhawm chu 59 a tling tawh a, hetiang zat goal khung tur hian match 23 an khel, eng team tan mah hetiang striker hlauhawm pahnih inkawp hi hmachhawn an châkawm lo khawp ang.
Maurizio Sarri-a'n a enkawl laiin, kum 2015-16 leh 2017-18 season khan an hmahruaina chu uiawm takah Juve lakah an lo thamral tir tawh, kuminah hian Luciano Spalletti hoin an ṭang tlang zo a ngem tih chu fiahna hautak a ni dawn.
Massimiliano Allegri an neih vangin Juventus an lawm a, mahse season hmasa khan beisei an phak lo bakah tun season tir lamah pawh an che chhe hle. Mahse, Italian manager hian a theihna tak tak a pholang ta a, tun hnaiah nasa takin hma an sawn ta.
Kum 2018 hnua a vawi khat nan Juve hi a zawnin vawi riat an chak leh ta a, record an neih hnuhnung zawk pawh hi Allegri-a'n a enkawl hmasak lai ami tho a ni, hemi ṭum hian a zawna a vawi riat nan league nomawi an chawi bawk.
Paul Pogba-a'n training zawm tawh mah se a la inkhelh dawn rih lo a, striker Dusan Vlahovic, Leonardo Bonucci leh Juan Cuadrado te an hliam bakah Mattia De Sciglio leh Bremer te dinhmun a chiang lo.
Player langsar ṭhenkhat inlan thei dawn lo mah se, forward Angel Di Maria chu a inkhel thei dawn thung. Argentina tana World Cup chawitu a inlan thei tur hi Napoli tlar hnung tan chuan chanchin lawmawm a ni lo thung ang.