Spanish Super Cup semifinal khel tur Real Madrid
Real Madrid an chawl hman lo - Spanish Super Cup semifinal-ah Madrid khaw club hian Valencia chu penalty hmangin 4-3 in an hneh a, final an lut.
Carlo Ancelotti enkawl Real hian minute 39-naah Karim Benzema-a penalty hmangin goal hmahruai an khung a, mahse, Valencia lam hian Samuel Lino hmangin si phurh an sut.
Hun tawp thlenga goal dang a luh loh hnuah penalty hmangin chak zawk zawn a ni a, Real tana pettu ten an pet goal vek laiin Valencia tan Erat Comert leh Jose Gaya ten an pet goal lo a, 4-2 in Real an chak.
Nizan khan semifinal inkhel dangah Real Betis leh Barcelona an intawng a, he thu buatsaih a nih lai hian result kan hre hman lo.
Sum tamna!
Middle-east a sum tamzia inhrilh nawn a ngai lo a, a hrechiangtu pakhat chu Royal Spanish Football Federation an ni - Saudi Arabia sorkar nen kum 2019 khan inremna neiin, season thum chhung Saudi-a Spanish Super Cup khel turin thutlukna an siam.
Hei mai a ni lo - La Liga leh Copa del Rey champion-in an khelh ṭhin inelna chu team pali inelna turin an ruahman a, 2019-20 season aṭang khan semifinal khelin final lut tur zawn ṭhin a ni.
Inremna neih a nih hnuah 2019-20 leh 2021-22 season chu Saudi-ah khelh a ni tawh a, kumin hi a ṭum thumna a ni - Saudi sorkar chuan tournament vawi khat thlen man zelah Spanish FA hnenah euro maktaduai 40 a pe.
2020-21 season kha Covid-19 avangin Spain-ah khelh a ni a, tun season hi inremna thar a awm a nih loh chuan Saudi-a Spanish Super Cup khelh hnuhnun ber tur a ni.
Inkhel chu
King Fahd International Stadium, Riyadh-ah inkhel en turin mipui 50,000 chuang an pungkhawm a, goal pawh kan hmu hma - minute 38-na lekah Eray Comert a chesual a, penalty a chawi.
Real tan striker chhuanvawr Karim Benzema a lo pen chhuak a, French striker hian goal-a chantir a harsa lo tih pholangin minute 39-naah goal hmahruai atan a khung a, 1-0 a ni der!
Madrid khaw club hi an chak leh mai rinna a lian hman. Mahse, Valencia-in an beidawng bik lo tih pholangin, Samuel Lino chuan minute 46-naah si phurh a sut.
Hun tawp thlengin goal dang a lut zui lo a, extra time hial khelh a ni chungin chak zawk an la awm lo - penalty hmanga chinfel a ni a, Real player-ten an pet goal vek laiin, Valencia tan Jose Gaya leh Eray Comert ten an hlah a, Real an chak.
Inzirna chu
Real Madrid keeper Thibaut Courtois chuan, "Goalkeeper nih hi chuan penalty hi zir a ṭul ṭhin. Gaya khan penalty a hlah hnuhnungah chuan Sevilla lakah a vei lamah a pet a, a pet goal hnuhnungah Real Betis lakah a laiah a pet bawk.
"Zaninah khan a petna tur lam rin dik kha a harsa lo a ni," a ti - Spanish Super Cup khelh vangin Real hian tun kartawpah La Liga match khelh tur an nei dawn lo.
Spanish Super Cup final hi Pathianni zanah khelh a ni dawn a, a dar zat erawh sawi chian a la awm lo - Real hi league champion vanga Super Cup khel an ni a, Valencia hi Copa del Rey finalist an ni thung.
Super Cup khel ve dang Real Betis hi Copa del Rey champion an ni a, Barca erawh La Liga pahnihna nih vanga inlan an ni thung - Real leh Barca hian Super Cup khelh vangin €2.8mtd ve ve an dawng a, Valencia (€1.7mtd) leh Betis (€750,000) ten an dawng bawk. Super Cup nomawi chawi thei chuan €2mtd an hlawh ang a, pahnihnain €1mtd an hlawh thung ang.